Akwarium

in Wikipedia, die vrye ensiklopedie
Spring na: navigasie, soek
'n Akwarium in Monaco

'n Akwarium is 'n bak met water waarin onderwater plante en diere deur mense aangehou word. Die akwarium kan 'n klein watertenk wees, of 'n groot gebou met een of meer tenks. Akwariums word gebruik om dier- en plantspesies te kweek, te versorg of ten toon te stel. Die wande is gewoonlik van glas of ander deurskynende materiale gemaak waardeur gesien kan word. Spesiale stelsels word gebruik om 'n stabiele ekologiese omgewing te bewerkstellig (soos waterfilters, termostate, verwarmers, ligte, ens.).

Soutwater-akwariums word gebruik om seelewe aan te hou, terwyl varswater-akwariums gebruik word vir die aanhou van spesies wat natuurlik in riviere en damme voorkom.

Openbare akwariums[wysig]

Groot openbare akwariums is dikwels populêre toeriste-aantreklikhede. Hulle stel die visse en ander akwatiese diere in groot tenks ten toon. Dit word ook soms ingespan om spesies te teel en van uitwissing te beskerm. Van die bekende openbare akwariums in Suid-Afrika sluit in: die Hartbeespoortdam-akwarium, Oos-Londen-akwarium, Two Oceans-akwarium in Kaapstad en Bayworld in Port Elizabeth.

Stokperdjie[wysig]

Die versorging van 'n akwarium is 'n gewilde stokperdjie reg oor die wêreld. Mense wat die stokperdjie beoefen poog om die visse in 'n omgewing soortgelyk aan hulle natuurlike habitat aan te hou. Dit behels die skoonhou van die water, beligting en spesiale voeding. Toerusting en visse kan by 'n troeteldierwinkel aangeskaf word.

Commons
Wikimedia Commons het meer media verwant aan:
Akwarium (bladsy)