Alessi (Italiaanse maatskappy)

in Wikipedia, die vrye ensiklopedie
Jump to navigation Jump to search
Alessi se vlagskipwinkel, New York

Alessi is 'n Italiaanse maatskappy wat huishoudelike items en kombuisgereedskap vervaardig en bemark. 'n Groot verskeidenheid ontwerpers, argitekte en industriële ontwerpers is verantwoordelik vir die ontwerp van die artikels, onder meer Achille Castiglioni, Richard Sapper, Alessandro Mendini, Ettore Sottsass, Wiel Arets, Zaha Hadid, Toyo Ito, Tom Kovac, Greg Lynn, MVRDV, Jean Nouvel, UN Studio, Michael Graves en Philippe Starck.

Geskiedenis[wysig | wysig bron]

Binnekant van 'n Alessi-winkel in Omegna, Italië

Alessi is in 1921 deur Giovanni Alessi, wat in Italië gebore is en in Switserland grootgeword het, gestig. 'n Paar jaar na die Eerste Wêreldoorlog het Alessi met die vervaardiging van 'n wye reeks tafelgerei in nikkel, chroom en versilwerde koper begin. Carlo Alessi (gebore 1916), die seun van Giovanni, het later die hoofontwerper van die maatskappy geword; tussen 1935 en 1945 het hy die meeste van Alessi se produkte ontwikkel.

1950's en 1960's[wysig | wysig bron]

Gedurende die vyftigerjare het Carlo Alessi die leiding van die maatskappy oorgeneem. Carlo Alessi se broer, Ettore Alessi het in 1955 samewerking met eksterne ontwerpers aangevoer. Hy het saam met argitekte soos Carlo Mazzeri, Luigi Massoni en Anselmo Vitale gewerk om verskeie produkte, hoofsaaklik vir die hotel- en spysenieringsbedryf, te vervaardig. Deur sy ingryping is baie individuele voorwerpe, wat topverkopers was, geproduseer. Die vyftigerjare was egter 'n moeilike tydperk om ontwerpersvoorwerpe te verkoop, aangesien dit slegs 'n paar jaar na die Tweede Wêreldoorlog was, en relatief min mense luukse items kon bekostig.

1970's en 1980's[wysig | wysig bron]

In 1970 was Alberto Alessi verantwoordelik vir die derde transformasie van die onderneming. Die Alessi-maatskappy is algemeen as een van die 'Italiaanse ontwerpfabrieke' beskou. In hierdie dekade, onder leiding van Alberto Alessi, het die onderneming met 'n aantal ontwerper-maestros, soos Achille Castiglioni, Richard Sapper, Alessandro Mendini en Ettore Sottsass saamgewerk. In die 70's vervaardig Alessi onder meer die Kruiderystel (soutpot, peperpot en tandestokkies) van Ettore Sottsass en 'n espressomaker deur Richard Sapper.

Die 1980's was 'n tydperk waartydens Italiaanse ontwerpfabrieke met massaproduksie moes meeding. Hierdie industrieë het 'n ander siening van ontwerp gehad; vir die Italiaanse ontwerpfabrieke was die ontwerp en gevolglik die ontwerper, die belangrikste deel van die proses, terwyl massaproduksie ontwerpe wat funksioneel en maklik vervaardig kon word, vereis het. [1] Tydens die 1980's het Alessi ook hulle bemarkingsbeeld verander van fabriek na industriële navorsingslaboratorium, 'n plek vir navorsing en produksie. Alessi-produkte wat tydens die 1980's uitgestaan het, was die Sapper-ketel en die maatskappy se eerste eetgerei, Dry deur Castiglioni. Alessi het met ontwerpers soos Aldo Rossi, Michael Graves en Philippe Starck saamgewerk, wat verantwoordelik was vir 'n paar van Alessi se topverkopers soos die Graves-ketel met 'n voëlfluitjie.

Gedurende die 1980's het Alessi, vir sy 'koffie- en teetorings', saam met verskeie argitekte van 'n nuwe generasie gewerk, byvoorbeeld Alessandro Mendini, Aldo Rossi, Robert Venturi, Richard Meier en Michael Graves. Elk van hierdie elf silwer koffie- en teestelle, wat in 1983 bekend gestel is, is in 'n beperkte produksie van 99 kopieē vervaardig.

Alessi het toenemend mededinging van ander internasionale vervaardigers gekry, veral met betrekking tot laekosteprodukte wat volgens massaproduksie vir kleinhandelaars soos Target Corporation en JC Penney vervaardig is.

1990's[wysig | wysig bron]

In die negentigerjare het Alessi, op versoek van ontwerpers, meer met plastiek begin werk. Ontwerpers het dit makliker gevind om met plastiek, eerder as met metaal te werk, en hulle was van mening dat dit vir hulle meer ontwerpvryheid en innoverende moontlikhede gebied het. Die negentigerjare is gekenmerk deur die tema "Family Follows Fiction" (gesin word beïnvloed deur fiksie), met speelse en verbeeldingryke voorwerpe. Kunstenaars wat volgens hierdie tema ontwerp het, sluit in Stefano Giovannoni en Alessandro Mendini, wat Fruit Mama ontwerp het en die topverkoper Anna G. Ten spyte van die toenemende gebruik van plastiek, het metaal steeds 'n gewilde materiaal gebly, byvoorbeeld vir die Girotondo-familie deur King Kong. Die innoverende Franse ontwerper Philippe Starck het 'n wye reeks gebruiksartikels met 'n speelse, humoristiese aanslag ontwerp.

2000's[wysig | wysig bron]

Die bekende argitek, Zaha Hadid, het struktureel-geïnspireerde huisware vir die Alessi-maatskappy ontwerp. 'n Merkwaardige ontwerp in die 2000's is die Blow Up-reeks deur Fratelli Campana, waar daar met vorms gespeel is om mandjies en bakke, wat lyk asof dit by aanraking uitmekaar sal val, te skep.

In 2006 het die maatskappy sy produkte geherklassifiseer onder drie afdelings: "A di Alessi", "Alessi" en "Officina Alessi". A di Alessi is meer 'demokraties' en meer 'pop', die laer prysklas van Alessi. Officina Alessi is meer eksklusief, innoverend en eksperimenteel, gekenmerk deur 'n klein produksiereeks en beperkte vervaardiging.

Alessi-produkte word in museums wêreldwyd uitgestal, byvoorbeeld in die Museum van Moderne Kuns (New York), Metropolitaanse Museum van Kuns, Victoria and Albert Museum, Pompidou Sentrum en Stedelike Museum Italië. Samewerking met die Nasionale Paleismuseum van Taiwan het tot die ontwerp van 'n versameling kombuisvoorwerpe met Asiatiese temas gelei.

Ontwerpers en hul ontwerpe[wysig | wysig bron]

Van 1945 tot vandag werk Alessi vir produkte saam met ontwerpers en selfs ander handelsmerke of ondernemings. Sommige van die bekendste ontwerpe en die ontwerpers daarvan, sluit in:

  • 1945 Bombé-tee- en koffieservies deur Carlo Alessi Anghini
  • 1978 Kruiderystel (soutpot, peperpot en tandestokkies) deur Ettore Sottsass
  • 1979 Programma 5 kroegtoebehore deur Ettore Sottsass
  • 1979 9090 espressomaker deur Richard Sapper
  • 1982 Dry eetgerei deur Achille Castiglioni, die eerste eetgerei wat deur Alessi vervaardig is
  • 1983 Bollitore fluitende waterketel deur Richard Sapper. Alessi se eerste 'ontwerperketel', met pype wat twee klanktone, mi en si, in harmonie fluit
  • 1984 La Conica-espressomaker deur Aldo Rossi
  • 1985 Ketel deur Michael Graves. Graves se ketel is bekend vir die voēltjie wat sing wanneer die water kook. Bypassende produkte soos 'n suikerpot en melkbeker is ook deur Graves ontwerp. Die Graves-ketel is die topverkoper in die geskiedenis van die Alessi-maatskappy.
  • 1989 Girotondo-reeks deur King-Kong
  • 1990 Juicy Salif-sapuitdrukker deur Philippe Starck
  • 1993 Fruit Mama deur Stefano Giovannoni. Die eerste ontwerp vir die Family Follows Fiction-reeks; opmerklik vir die esteties-teenstellende gebruik van plastiek en vlekvrye staal.
  • 1994 Anna G-kurktrekker deur Alessandro Mendini. Met haar glimlaggende gesig was die kurktrekker sedert die eerste vrystelling 'n topverkoper, wat tot die ontwerp van die Anna-familie, 'n reeks van verskeie verwante voorwerpe vir die kombuis en eettafel gelei het.
  • 1995 Mary Biscuit deur Stefano Giovannoni. Koekie- of beskuithouer.
  • 1997 Nono di Antonio knoffelkneuser deur Guido Venturini
  • 2004 Blow Up-reeks deur Fratelli Campana. Mandjies en bakke vir vrugte.
  • 2006 Kaj-polshorlosie deur Karim Rashid
  • 2013 Opgetooide (Dressed) eetservies en eetgerei deur Marcel Wanders  
  • 2015 Collo Alto-eetgerei deur Inga Sempé [2]
  • 2017 Forma-kaasrasper deur Zaha Hadid

Sien ook[wysig | wysig bron]

  • Napolitaanse koffiepot

Verwysings[wysig | wysig bron]

  1. "Alberto Alessi, Design as Art: Postmodernism at the International Design Symposium" (in Engels). 15 November 2012. Geargiveer vanaf die oorspronklike op 3 Augustus 2016. Besoek op 29 Augustus 2017.
  2. Cutlery set Collo Alto www.ingasempe.fr, retrieved 15 November 2015.

Eksterne skakels[wysig | wysig bron]