Andre Boezak

in Wikipedia, die vrye ensiklopedie
Jump to navigation Jump to search

André Boezak is ’n predikant, gemeenskapsleier, digter en skrywer.

Lewe en werk[wysig | wysig bron]

André Boezak is op 29 September 1960 op ’n wynplaas gebore en word op Simondium naby die Paarl groot.[1] Hy is die oudste kind van vier kinders, twee seuns en twee dogters, van die onderwyser Alwyn Boezak en sy vrou Elizabeth. In 1975 trek die gesin na die Paarl en hy matrikuleer in 1978 op die dorp aan die Noorder-Paarl Senior Sekondêre Skool. As musikant slaag hy in hierdie tyd sy graad sewe in klavier. Ná skool studeer hy verder in die Teologie aan die Universiteit van die Wes-Kaapland. Omdat hy nie ’n beroep kry nadat hy kwalifiseer nie, hou hy vir ’n jaar skool by die “rofste skool” in die Boland, Paulus Joubert,[2] waarna hy in die bediening tree as predikant van die Verenigende Gereformeerde Kerk. Hy tree in 1986 in die huwelik met Dawn, wat hy op universiteit ontmoet, en die egpaar het drie kinders, met Darren die oudste. Vanaf Maart 1988 bedien die egpaar die gemeente op Lady Grey in die Oos-Kaap, maar hy aanvaar in Mei 1994 ’n beroep na die gemeente in Bridgton op Oudtshoorn. In 1991 word hy verkies tot die bestuur van die Afrikaanse Skrywersgilde[3] en hy word in 2006 ook ’n direkteur van die Klein Karoo Nasionale Kunstefees (KKNK). Verder is hy direkteur en voorsitter van die direksie van die plaaslike radiodiens Suid-Kaap Stereo. By verskeie geleenthede tree hy self by die KKNK op, onder andere vir etlike jare vanaf 1995 in “Stoepstories” en in 2008 in “Karoo digters”, terwyl hy ook by Woordfees op Stellenbosch as storieverteller optree. Hy is ook ’n bedrewe musikant wat sy graad 7 musiekeksamens in klavier geslaag het.

Skryfwerk[wysig | wysig bron]

Reeds van jongs af skryf hy rympies en versies. Vanaf 1976 raak sy gedigte egter die uitlaatklep vir sy emosies en frustrasies. Sy verse staan in die teken van die stryd teen apartheid en die onregte van hierdie beleid en word in verskeie versamelbundels opgeneem, waaronder “Aankoms uit die skemer”, “Ons kom van ver af”, “Groot verseboek” en “Die Afrikaanse poësie in ’n duisend en enkele gedigte”. Die gedig “Julle kamma sing” (onder andere in “Aankoms uit die skemer” opgeneem), verskaf ’n treffende teenstelling met “Die stem van Suid-Afrika” (waarin die besitsverhouding beklemtoon word deur die herhaalde gebruik van die woord “ons”) te stel teen die ervarings van diegene wat van besit ontneem is.  Saam met ander Oudtshoornse digters en skrywers (Poem Mooney, Jan van Wyk en Hans Oosthuizen) gee hy ’n gesamentlike bundel uit wat onder die titel “Die Fonteyn” verskyn en in 1996 by die KKNK bekend gestel word. Die bundel bevat gedigte en prosa. Hy skryf ook sketse en kortverhale, waarvan sommige in Ligdraer verskyn. Sy kortverhaal “Die verdwaalde psalm”, wat in 1997 in Rooi Rose gepubliseer is, word deur Abraham H. de Vries in die versamelbundel “Uit die kontreie vandaan” opgeneem en munt uit in sy taalgebruik van die streek. Boezak se kortverhale, waarin die kontrei se mense en hulle gewoontes die tema is, word daarna gebundel in “’n Bek issie ding wat afdraend praat”. In 2012 debuteer sy drama “Windbrekers en Wegbrekers” by die Klein Karoo Nasionale Kunstefees. Hierin word die verhaal vertel van drie mans wat óf windbrekers word (iemand wat goed doen in die lewe en sukses behaal) óf wegbrekers (iemand wat homself en sy oorgelewerde waardes verloor en ’n verkeerde rigting inslaan).

Publikasies[wysig | wysig bron]

Jaar Publikasies
1996 Die Fonteyn (saam met Poem Mooney, Jan van Wyk en Hans Oosthuizen)
2012 ’n Bek issie ding wat afdraend praat

Bronnelys[wysig | wysig bron]

Boeke[wysig | wysig bron]

  • Kannemeyer, J.C. “Die Afrikaanse literatuur 1652-2004” Human & Rousseau Kaapstad en Pretoria Eerste uitgawe 2005
  • Willemse, Hein “Aan die ander kant” Protea Boekhuis Pretoria Eerste uitgawe Eerste druk 2007

Tydskrifte en koerante[wysig | wysig bron]

  • Pretorius, Willem “Ek bly ’n gevangene van hoop” “Beeld” 19 September 1991

Internet[wysig | wysig bron]

Ander verwysings[wysig | wysig bron]

  1. Willem Pretorius se artikel “Ek bly ’n gevangene van hoop” in Beeld van 19 September 1991
  2. Beeld van 19 September 1991
  3. Beeld van 19 September 1991