Annemari Coetser

in Wikipedia, die vrye ensiklopedie
Jump to navigation Jump to search
Annemarie Coetser
Foto:
www.boekemakranka.co.za[1]

Annemari Coetser[2] (29 September 1945, Durban –) is 'n Suid-Afrikaanse skryfster wat veral bekendheid verwerf het as romanskrywer. Sy skryf hoofsaaklik romans vir volwassenes, maar publiseer ook 'n jeugverhaal, kinderversies en verskeie kortverhale. Sy verwerf deur die loop van haar loopbaan verskeie pryse vir haar skryfwerk.

Lewe en werk[wysig | wysig bron]

Sy is op 29 September 1945 in Durban gebore. Sy matrikuleer in 1962 aan die Hoërskool Indwe en studeer daarna deeltyds aan die Universiteit van Suid-Afrika, waar sy 'n Laer Diploma in Biblioteekkunde verwerf. Sy werk vir 'n lang tyd as bibliotekaresse en woon onder andere in Bloemfontein, die Verenigde State van Amerika, Namibië en in Pretoria. Tans woon sy saam met haar man, Paul van Helden, in Pretoria.

Skryfwerk[wysig | wysig bron]

Kortverhale[wysig | wysig bron]

Vroeg in haar skryfloopbaan publiseer sy 'n aantal kortverhale in tydskrifte en sy skryf ook 'n aantal stories vir die Siembamba-program oor die radio.

Sy maak ook 'n bydrae tot die kortverhaalbundel Viersprong, wat sy saam met Anel Heydenrych, Trisa Hugo en Nadia de Kock skryf.

Romans[wysig | wysig bron]

Sy verwerf groter bekendheid wanneer haar eerste roman, Oop kaarte,[3][4] verskyn, wat 'n finalis is in Sanlam en Insig se Groot Romanwedstryd. In Oop kaarte het die hoofkarakter Leandi 'n seksuele verhouding met die getroude Renier de Ridder, wat in 'n sogenaamde oop huwelik met sy vrou betrokke is.

Langverlof[5][6] vertel die verhaal van Kari, 'n sekretaresse op die Oos-Kaapse platteland, wat op 'n advertensie reageer en dan uitvind dat sy uit honderde ander aansoekers gekies is om saam met 'n aantreklike man, Hagen, op Mauritius te gaan vakansie hou. By die huis moet sy die bestendige Gottfried agterlaat. Hierdie boek is in 2009 op die kortlys vir die toekenning van die ATKV se prys vir liefdesromans en op die kortlys van die M-Net-prys se filmkategorie.

Aan die windkant[7] vertel van Liefka, wat haar werk in die stad verloor en haar na bywoning van 'n lewensverrykingskursus op die platteland vestig. Hier wag ander probleme op haar, soos haar ouers se dreigende egskeiding, vigswesies en siekte, terwyl sy steeds haar jeug en verlies van werk emosioneel moet verwerk.

In Die kamer langsaan[8] pak Donné haar tasse na 'n rusie met haar man. Sy trek in 'n meenthuis in met die plan om haar eerste roman te skryf. Die meenthuis behoort aan Theresa en sy en haar 93-jarige ma, Susan, woon in 'n ouetehuis. In haar roman skep Donné 'n verbeelde werklikheid rondom Theresa en haar ma. Sy vind dan tot haar ontsteltenis by die skinderlustige buurvrou uit dat haar verhaal van familieverhoudings, huweliksontrou en depressie skrikwekkend naby aan die waarheid is.

Skryfwerk vir kindersen die jeug[wysig | wysig bron]

Vlis met vlerke is 'n jeugverhaal, waarin Andine, haar boetie Zander en die au pair Jam by Jam se oom en tannie gaan kuier. Hier ontmoet hulle die vreemdste karakters en wag 'n skrikwekkende ervaring op hulle.

Sy skryf ook graag kinderversies en nege van haar kinderversies word opgeneem in Riana Scheepers se Nuwe Kinderverseboek.

Publikasies [9][wysig | wysig bron]

  • 2007 – Oop kaarte
  • 2008Langverlof
  • 2009 – Aan die windkant
  • 2010 – Vlis met vlerke
  • 2012 – Die kamer langsaan

Verwysings[wysig | wysig bron]

  1. Boekemakranka: http://www.boekemakranka.co.za/Annemari.htm
  2. Liefdesverhale: http://www.liefdesverhale.co.za/authors/2395
  3. Roux, Jaybee. Beeld, 28 Januarie 2008.
  4. Van Zyl, Irna. Boeke-Insig, no.2 Somer 2008.
  5. Roux, Jaybee. Beeld, 24 November 2008.
  6. Van Zyl, Irna. Boeke Insig, No. 6, Somer 2009.
  7. Roux, Jaybee. Beeld, 25 Januarie 2010.
  8. Bennett, Nini. Rapport, 15 April 2012.
  9. NB-Uitgewers: http://www.nb.co.za/authors/2395