Another Country
| Another Country | |
|---|---|
| Regisseur | Marek Kanievska |
| Vervaardiger | Alan Marshall, Robert Fox |
| Draaiboek | Julian Mitchell |
| Met | Rupert Everett Colin Firth Cary Elwes |
| Musiek deur | Michael Storey |
| Kinematografie | Peter Biziou |
| Redigeerder | Gerry Hambling |
| Ateljee | Virgin Films Goldcrest National Film Finance Corporation Eastern Counties Newspapers, Ltd. |
| Verspreider | 20th Century Fox |
| Uitgereik | 1984 |
| Speeltyd | 90 minute |
| Land | Brittanje |
| Taal | Engels |
| IMDb-profiel | |
Another Country is 'n Britse romantiese historiese dramarolprent van 1984 wat deur Julian Mitchell geskryf is. Die draaiboek is verwerk van sy toneelstuk met dieselfde naam. Die rolprent is deur Marek Kanievska geregisseer en die rolverdeling sluit in Rupert Everett en Colin Firth in sy rolprentdebuut.
Another Country is losweg geskoei op die lewe van die spioen en dubbelagent Guy Burgess (Guy Bennett in die rolprent). Dit onthul sy homoseksualiteit en blootstelling aan Marxisme, terwyl dit ondersoek instel na die hipokrasie en snobisme van die Engelse openbareskoolstelsel.
Storielyn[wysig | wysig bron]
.jpg)
Die rolprent speel in 'n Britse openbare skool af wat geskoei is op die Eton en Winchester van die 1930's. Guy Bennett (Rupert Everett) en Tommy Judd (Colin Firth) is leerlinge en omdat albei op sy manier 'n buitestaander is, is hulle vriende (Bennett is gay en Judd is 'n Marxis).
Eendag kom 'n onderwyser af op Martineau (Philip Dupuy) en 'n seun van 'n ander koshuis terwyl hulle saam masturbeer. Martineau hang homself daarna, terwyl die onderwysers en senior leerlinge probeer om die skandaal van die ouers en buitewêreld weg te hou. Die gay skandaal gee die weermagobsessiewe huiskaptein Fowler (Tristan Oliver) egter 'n welkome rede om teen Bennett te knoei. Fowler hou nie van hom en Judd nie en wil keer dat Bennett 'n "god" word: 'n skooltitel vir die twee topprefekte.
Fowler kom af op 'n liefdesbriefie van Bennett aan James Harcourt (Cary Elwes). Bennett stem in tot 'n pak slae sodat Harcourt nie in die moeilikheid kom nie; op vorige geleenthede het hy straf vrygespring deur ander af te pers met die dreigement om hulle eie ondervindings met hom te onthul.
Judd is intussen teensinnig om 'n prefek te word, want hy voel hy kan nie 'n "onderdrukkende stelsel" soos dié onderskryf nie. Hy maak 'n onvergeetlike, bitter toespraak oor hoe die seuns wat deur die stelsel onderdruk word, opgroei in die vaders wat die stelsel onderhou. Eindelik stem hy egter in om 'n prefek te word om te keer dat die gehate Fowler hoofseun word. Dit gebeur nooit, want Donald Devenish (Rupert Wainwright) stem in om in die skool te bly en 'n prefek te word indien hy as "god" benoem word in plaas van Bennett.
Bennett is verpletter deur die mislukking van sy groot droom om 'n "god" te word en besef die Britse klassestelsel steun swaar op uiterlike voorkoms en dat om openlik gay te wees, 'n groot struikelblok is in sy beplande loopbaan as diplomaat.
Die prent se epiloog vertel hy het later in sy lewe na Rusland oorgeloop nadat hy 'n spioen vir die Sowjetunie was. Judd is dood in 'n geveg tydens die Spaanse Burgeroorlog.
Akteurs[wysig | wysig bron]
- Rupert Everett as Guy Bennett
- Colin Firth as Tommy Judd
- Cary Elwes as James Harcourt
- Michael Jenn as Barclay
- Robert Addie as Delahay
- Rupert Wainwright as Donald Devenish
- Tristan Oliver as Fowler
- Piers Flint-Shipman, credited as Frederick Alexander, as Jim Menzies
- Adrian Ross Magenty as Wharton
- Geoffrey Bateman as Yevgeni
- Philip Dupuy as Martineau
Charles Spencer, die 9de Graaf Spencer, die jonger broer van Diana, Prinses van Wallis, is in drie tonele 'n ekstra (sonder dialoog).
Produksie[wysig | wysig bron]
Eton-kollege, waar Burgess skoolgegaan het, het die versoek geweier dat die rolprent op sy skoolterrein geskiet word.[1] Die Old Schools Quadrangle by die Universiteit van Oxford het toe een van die belangrike rolprentstelle vir die prent geword. Baie binneskote is geskiet by Althorp, die tuiste van die Spencerfamilie.[1]
Rupert Everett, wat die rol van Bennett in die toneelstuk se eerste seisoen gespeel het, is vir dié rol in die fliek gekies. Twintig jaar later het Everett weer die hoofrol gespeel in 'n prent met Marek Kanievska as regisseur, A Different Loyalty (2004). Hy was daarin 'n spioen wat geskoei is op Kim Philby, saam met Guy Burgess lid van die groep spioene bekend as die Cambridge-5.
Die rolprent is ingeskryf vir die Cannes-rolprentfees van 1984, waar dit die prys vir beste artistieke bydrae gewen het.[2][3] Dit is vir drie Baftapryse in rolprente benoem: redigering (Gerry Hambling), beste nuweling (Rupert Everett) en verwerkte draaiboek (Julian Mitchell).[4]
Verwysings[wysig | wysig bron]
- ↑ 1,0 1,1 The Worldwide Guide to Movie Locations Geargiveer 13 April 2012 op Wayback Machine Film locations for Another Country
- ↑ "Festival de Cannes: Another Country". festival-cannes.com. Besoek op 22 Junie 2009.
- ↑ Festival de Cannes Awards Database Geargiveer 3 Februarie 2014 op Wayback Machine, 1984.
- ↑ BAFTA Awards Database Another Country, 1984.
Skakels[wysig | wysig bron]
Hierdie artikel is in sy geheel of gedeeltelik uit die Engelse Wikipedia vertaal.
