Asura

in Wikipedia, die vrye ensiklopedie
Die reliëfwerk Samudra manthan ("Die karring van die oseaan") by Angkor Wat, Kambodja, toon Wisjnoe in die middel in sy Kurma-avatar en die asuras en devas weerskante van hom.

Asuras (Sanskrit: असुर) is mitologiese goddelike wesens in Indiese geskrifte wat om mag meeding met die meer welwillende devas (ook bekend as suras).[1] Asuras word in dié geskrifte beskryf as magtige halfgode of demone met goeie of slegte eienskappe. Die goeie asuras word adityas genoem en deur Varuna gelei, terwyl die bose asuras danava genoem en deur Vritra gelei word.[2]

In die vroegste Vediese geskrifte word Agni, Indra en ander gode ook "asuras" genoem, in die sin van "meesters" van hul onderskeie domeine, kennis en vermoëns. In latere tekste word die welwillende gode "devas" genoem, terwyl die asuras met hulle meeding en beskou word as "vyande van die gode", of demone.[3]

Asuras is deel van die Indiese mitologie, saam met devas, yakshas (natuurgeeste) en rakshasas (spoke, monsters), en kom voor in een van baie kosmologiese teorieë in Hindoeïsme.[4][5]

Verwysings[wysig | wysig bron]

  1. Wash Edward Hale (1999), Ásura in Early Vedic Religion, Motilal Barnarsidass, ISBN 978-8120800618, pages 2-6
  2. Wash Edward Hale (1999), Ásura in Early Vedic Religion, Motilal Barnarsidass, ISBN 978-8120800618, page 4
  3. Wash Edward Hale (1999), Ásura in Early Vedic Religion, Motilal Barnarsidass, ISBN 978-8120800618, pages 5-11, 22, 99-102
  4. Don Handelman (2013), One God, Two Goddesses, Three Studies of South Indian Cosmology, Brill Academic, ISBN 978-9004256156, pages 23-29
  5. Wendy Doniger (1988), Textual Sources for the Study of Hinduism, Manchester University Press, ISBN 978-0719018664, page 67