Azaria Mbatha
| Azaria Mbatha | |
|---|---|
| Gebore | 1941 Mabeka, Natalprovinsie, Unie van Suid-Afrika |
| Sterf | |
| Nasionaliteit |  Suid-Afrika |
| Veld | Kunstenaar |
| Opleiding | Konst Fack-kunsskool, Stockholm |
Azaria Mbatha (1941 -) is 'n Suid-Afrikaanse kunstenaar.[1][2][3][4][5]
Mbatha is in Mabeka, KwaZulu-Natal, gebore. Van 1961 af het hy as klerk in Vryheid gewerk, maar is in die Ceza-sendinghospitaal opgeneem nadat hy tuberkulose opgedoen het. Dit is hier waar Mbatha se belangstelling in die kuns geprikkel is: Peder Gowenius, 'n Sweedse sendelingonderwyser, het hom aangemoedig om linosneewerk te doen. Ná hy uit die hospitaal ontslaan is, is hy as voltydse student na die kunsskool in Umpumulo wat in 1961 deur Gowenius gestig is. Daarná is Mbatha na die Rorkes Drift-kunssentrum, waar hy 'n tyd lank kunsonderrig gegee het.
Mbatha het sy eerste eenmanuitstalling in 1965 gehou, en in dieselfde jaar die Art SA Today-toekenning ontvang. Hy het in 1966 aan die Republiekfees-uitstalling deelgeneem. Pas daarná is 'n studiebeurs aan hom toegeken en hy is na die Konst Fack-kunsskool in Stockholm, waar hy vir 'n jaar lank gestudeer het. Hy het in 1967 na Rorkes Drift teruggekeer, maar woon tans in Swede.
Azaria Mbatha is 'n grafiese kunstenaar. Hy het aanvanklik linosneë en muurskilderwerk gedoen, maar doen nou ook syskermdrukwerk en kopergravures. Hy het die inspirasie vir sy vroeëre werk duidelik uit die godsdiens geput: die meeste werke is persoonlike interpretasies van Bybelverhale en dit word vandag nog as van sy beste werk beskou. Sy vroeë linosneë was verhalend en is in 'n Romaanse styl uitgevoer, maar sy latere werk het meer klem op die tradisie en die volkskunde gelê.
Mbatha het talle uitstallings in Suid-Afrika gehou, asook in Swede, en sy werk word in die Nasionale Kunsgalery in Kaapstad, die Pretoriase Kunsmuseum en die Museum of Modern Art in New York verteenwoordig.[5]
Verwysings
[wysig | wysig bron]- ↑ "Azaria Mbatha op SAHO". Geargiveer vanaf die oorspronklike op 1 Februarie 2023. Besoek op 19 Februarie 2024.
- ↑ "Azaria Mbatha op revisions.co.za". Geargiveer vanaf die oorspronklike op 4 Desember 2023. Besoek op 19 Februarie 2024.
- ↑ "Azaria Mbatha op lifewithart.com". Geargiveer vanaf die oorspronklike op 20 November 2023. Besoek op 19 Februarie 2024.
- ↑ "Azaria Mbatha op www.art-archives-southafrica.ch". Geargiveer vanaf die oorspronklike op 17 Augustus 2022. Besoek op 19 Februarie 2024.
- ↑ 5,0 5,1 "Azaria Mbatha op moma.org". Geargiveer vanaf die oorspronklike op 23 Mei 2022. Besoek op 19 Februarie 2024.
Bronnelys
[wysig | wysig bron]- Lewis, Ian C.: Umpumulo ... Monument to a brilliant Scandinavian missionary. In: Lantern. Tydskrif vir Kennis en Kultuur. Jaargang 14, nr. 4, Junie 1965
- Wêreldspektrum, Vol. 18, 86, ISBN 0 908409 591
