Barklybrug

in Wikipedia, die vrye ensiklopedie
Jump to navigation Jump to search

Barklybrug (meestal egter Barkly Bridge) is ‘n spoorweghalte en spoorbrug oor die Sondagsrivier sowel as die omliggende boerderygebied in die Oos-Kaap.

Spoorlangs is die brug 42 km van Port Elizabeth en by 33° 37′ suid en 25° 42′ oos. Die oorspronklike brug is in Skotland deur die Lanarkshire Steel Co. vervaardig, in groot stukke na die Kaap verskeep en op die rivieroewer aanmekaar gesit. Dit bestaan uit 6 spanne met ‘n totale lengte van 33 m. Dit dateer uit 1876 en die bou het die opening van die spoorlyn na die noorde aansienlik vertraag.

Die taklyn van 85 km tussen Alexandria en Barklybrug is op 18 Mei 1909 geopen en het sigorei, melk en hout uit Alexandria se bosse vervoer. Skoolkinders uit die Alexandria-omgewing moes op Barklybrug en weer op Alicedale oorklim om by hul skole op Grahamstad te kom. In 1936 het Barklybrug se stasie (op die noordelike oewer) selfs ‘n stasiemeester, ‘n voorman en ‘n stasiekafee gehad. Aangeslikte sand is daar in die rivierbedding versamel vir gebruik in die metaalgieterybedryf.

Die brug is vernoem na die Kaapse goewerneur Henry Barkly. Teenswoordig staan die stasiegebou verlate omdat die treindiens na Alexandria in 1993 gestaak is. Die oorspronklike brug is nou ‘n enkellaan-padbrug en ‘n betonbrug dra die treinverkeer.

Bibliografie[wysig | wysig bron]

  • Boonzaaier, J.W.C. (Boon): Spore oor die veld – ‘n spoorwegsafari deur Suider-Afrika. Warmbad: 2008. ISBN 978-0-620-41712-9
  • Burman: Early railways at the Cape. Kaapstad: Human & Rousseau. 1984. ISBN 0-7981-1760-5
  • Logie, Bartle: Sundays – Tales from a winding river. Port Elizabeth: Bluecliff Publishing. 2011. ISBN 978-0-9870017-2-6