Bespreking:Alexandria, Oos-Kaap

Vroeë geskiedenis en ontstaan van die dorp

Olifantshoek, so genoem weens die groot troppe olifante wat hier aangetref is, was die mees afgeleë wyk in die distrik Uitenhage, wat in 1817 gestig is. Voor 1817 was hierdie gebied nog deel van die distrik Graaff-Reinet. Hierdie wyk het in die veldkornetskap van Onder- Boesmansrivier geval. Evert Frederick Potgieter skenk gedurende 1832, 300 morg van sy plaas Brakfontein sodat ‘n dorp hier aangelê kan word maar dit is nooit gefinaliseer voordat hy aan die Groot Trek deelgeneem het nie. Die grond is wel later aangekoop vir diè doel. Op hierdie deel van Brakfontein staan toe die klein buitekerkie wat deur Karel Landman met slawe-arbeid gebou is, en waar ds. Alexander Smith van Uitenhage gereeld vir die inwoners van Olifantshoek kom dienste hou het. Hierdie stuk grond het toe as gevolg van die kerkie die naam Kerkplaats gekry.

Gedurende 1840 is daar oorgegaan tot dorpstigting en is die naam verander van Kerkplaats na Alexandria, vernoem na ds. Alexander Smith wat vanaf Januarie 1824, as predikant van die Nederduitse Gereformeerde gemeente, Olifantshoek dikwels besoek het om die lidmate in hierdie groot wyk te bedien. Uit erkentlikheid aan hom is sy naam ook in 1854 aan die nuwe N.G. gemeente gegee. In 1924 word die dorp onder beheer van ‘n dorpsbestuur geplaas en gedurende 1938 kry Alexandria munisipale status. – Hierdie ongetekende kommentaar is deur Marie Greyvenstein (Bespreking • Bydraes) gelewer. 11 Augustus 2019‎