Biljoen

'n Biljoen is tien tot die mag 12, dus 1 000 000 000 000 of 10¹². Dit is 'n miljoen tot die 2de mag, vandaar die naam (bi is twee in Latyn).

Die SI-voorvoegsel vir 'n biljoen is tera, afgekort as T. Voorbeeld: 1 teragreep = 1 biljoen grepe.

In sommige taalvariante, waaronder Britse en Amerikaanse Engels, het die kognaat van biljoen 'n ander betekenis. Dit is wat in Afrikaans 'n miljard genoem word, dus 1 000 miljoen of 1 000 000 000 (10⁹). 'n Biljoen is in Engels trillion (1 000 × 1 000³). Die rede vir die verskil in die name is omdat twee verskillende stelsels, die kort en die lang skaalverdeling, in verskillende dele van die wêreld gebruik word. In Afrikaans word die lang skaal gebruik en in Britse en Amerikaanse Engels die kort skaal. Die historiese definisie van die Britse Engelse woord billion het die lang skaalverdeling gebruik.

Die ontbinding van 1 biljoen in priemfaktore is: 1 000 000 000 000 = 2¹² × 5¹²

Interessante feite

'n Biljoen sekondes duur ongeveer 31 690 jaar.
'n Biljoenêr is iemand met 'n betaalvermoë van minstens 1 biljoen munteenhede en 'n multibiljoenêr is iemand wat meer as 2 biljoen munteenhede besit.
Die Andromeda-sterrestelsel, die naaste spiraalsterrestelsel aan die Aarde, het sowat 1 biljoen sterre.

Bronne

"Taalgebruik: miljard, biljoen, triljoen". Maroela Media. 15 April 2021.

Sien ook

Eksterne skakels

Wikiwoordeboek het 'n inskrywing vir biljoen.