Birchenoughbrug
Die Birchenoughbrug oor die Saverivier is van groot ekonomiese belang vir Zimbabwe. Dit is een van die grootste enkelspanbrûe ter wêreld.
Ligging[wysig | wysig bron]
Hierdie indrukwekkende staalbrug kruis die Saverivier net noord van die samevloeiing met die Devurerivier op 493 meter bo seespieël by die GPS-koördinate 19°57′43″S 32°20′40″O / 19.96194°S 32.34444°O. Dit is 62 km noordwes van Chipinge, 134 km suid van Mutare en 181 km oos van Masvingo. Dit verbind Masvingo en Buhera met Mutare, Chimanimani en Chipinge in die ooste van die land.
Brug[wysig | wysig bron]
Dit is 329 m lank en 85 m bo die rivierbedding. In 1984 is die brug op koste van die Wêreldbank versterk en verbreed tot 10 m, maar in die jaar 2000 is daar na ernstige vloedskade 'n massabeperking van 25 ton op die brug geplaas en slegs een voertuig op 'n slag word oor die brug toegelaat.
Geskiedenis[wysig | wysig bron]
Die brug is ontwerp deur Ralph Freeman, die raadgewende ingenieurs was sir Douglas en Francis Fox van Londen en die bouers was Dorman Long en kie. Wêreldwyd is die brug geprys as ‘n hoogstaande ingenieursprestasie. Die projek is gefinansier deur die Beit Trust en is op 20 Desember 1935 deur die goewerneur van Suid-Rhodesië, sir Herbert Stanley, geopen en vernoem na sir Henry Birchenough (1853-1937) as erkenning vir sy bydrae tot die ontwikkeling van Suid-Rhodesië. Gedenkplate aan die brug erken sy bydrae. Hierdie brug het dit moontlik gemaak om in alle seisoene per pad van Kaapstad na die destydse Belgiese Kongo te ry. Boonop het dit die roete met sowat 1 000 km verkort.
Vergelyking[wysig | wysig bron]
- Hierdie brug was ten tyde van sy ingebruikname naas die Sydneyhawebrug (503 m) in Australië en die Bayonne-brug (510 m) in New York die langste enkelspanbrug in die wêreld.
- Ralph Freeman was ook die ontwerper van die Sydneyhawebrug en die Beitbrug oor die Limpoporivier.
- Dorman Long het ook die Sydney-brug ontwerp.
- Die Birchenoughbrug het in 1962 as model gedien vir die Ayub-brug van 246 m in Pakistan. Dit is ook deur Dorman Long gebou.
Trivia[wysig | wysig bron]
Die dorpie by die brug staan bekend as Birchenough Bridge.