Blackburn

in Wikipedia, die vrye ensiklopedie
Jump to navigation Jump to search
Blackburn
'n Uitsig oor Blackburn
'n Uitsig oor Blackburn
Blackburn is in Engeland
Blackburn
Blackburn
Koördinate: 53°44′41″N 2°28′36″W / 53.74472°N 2.47667°W / 53.74472; -2.47667Koördinate: 53°44′41″N 2°28′36″W / 53.74472°N 2.47667°W / 53.74472; -2.47667
LandVlag van Verenigde Koninkryk Verenigde Koninkryk
Land (VK)Vlag van Engeland Engeland
GraafskapFlagOfLancashire.svg Lancashire
Hoogte
0,20 m (,64,84 ft)
Bevolking
 • Totaal117 963
TydsoneUTC+0:00 (MGT)
 • SomertydUTC+1:00 (BST)
Poskode
BB1, BB2
Skakelkodes01254

Blackburn [ˈblækbərn] is 'n groot katedraal- en nywerheidsdorp in die ooste van die nie-metropolitaanse seremoniële Engelse graafskap Lancashire, noord van die West Pennine Moors teen die suidelike rand van die Ribble-vallei geleë, 13 km oos van Preston en 34 km noordwes van Manchester. Saam met Darwen in die suide val Blackburn administratief onder die beheer van die unitêre owerheid (unitary authority) Blackburn with Darwen. Blackburn dien as die administratiewe setel van hierdie plaaslike owerheid.

Wesaansig van Blackburn se katedraal

Die bevolking van Blackburn is in 2018 op sowat 120 000 beraam van wie sowat 70 persent van Engelse afkoms is. Grootskaalse immigrasie van Islamitiese Indiërs en Pakistani's het van Blackburn een van die etnies en godsdienstig mees verdeelde nedersettings in die land gemaak.[1]

Lancashire was gedurende die Middeleeue een van die armer streke van Engeland met min groter nedersettings. So was ook Blackburn oorspronklik 'n betreklik klein nedersetting wat eers in die 16de eeu tot 'n markdorp ontwikkel het. Naas weeklikse markte is met Blackburn Fair 'n jaarmark gehou wat besoekers van dwarsoor Lancashire gelok het. In 1514 is Blackburn se gimnasium gestig.

Blackburn het danksy die nywerheidsomwenteling vanaf die laat 18de eeu merkwaardige ekonomiese en bevolkingsgroei ervaar. Die eerste sensus in 1801 het sy bevolking as 11 000 bepaal. Gedurende die bloeitydperk van die tekstielbedryf was Blackburn die grootste wewersdorp ter wêreld waaraan Mahatmi Gandhi in 1931 'n besoek gebring het om die plaaslike tekstielnywerheid te bestudeer.[2] In April 1865 is Blackburn se katoenbeurs geopen waar weekliks op Woensdae 'n garingmark gehou is. Die katoenhandel is later na Manchester verskuif. Voorbeelde van vroeë tekstielmasjiene en weefstoele, waaronder James Hargreaves se Spinning Jenny en die kaardmasjien, wat hy in 1760 ontwikkel het, word in die Blackburn Museum & Art Gallery vertoon.[3] Die museum beskik daarnaas oor eersterangse versamelings van muntstukke (waarvan die oudstes sowat 3 000 jaar oud is), handskrifte en boeke.[4]

Die Anglikaanse diosees Blackburn is in 1926 geskep. Die plaaslike St Mary's Church, wat in 1826 opgerig is, dien sedertdien as die biskop van Blackburn se katedraal.

Blackburn word tans onder meer verbind met die Thwaites-brouery, met 'n geskiedenis wat meer as 200 jaar terug strek, en die sokkerklub Blackburn Rovers F.C.

Verwysings[wysig | wysig bron]

  1. Express.co.uk, 7 Desember 2016: Apartheid on the streets of Blackburn: How political correctness killed integration. Besoek op 30 April 2020
  2. Peter Long: The Hidden Places of England. Vierde uitgawe. Aldermaston, Berks: Travel Publishing 2004, bl. 331
  3. Blackburn Museum & Art Gallery: The Collections – Social History. Besoek op 30 April 2020
  4. Mark Fisher: Britain's Best Museums and Galleries. From the Greatest Collections to the Smallest Curiosities. London: Allen Lane | Penguin Books 2004, bl. 265-266

Eksterne skakels[wysig | wysig bron]