Bojarinja Morozowa

in Wikipedia, die vrye ensiklopedie
Spring na: navigasie, soek
’n Deel van die skildery Bojarinja Morozowa van Wasili Soerikof, wat Feodosija se arrestasie deur die Russiese regering in 1671 uitbeeld. Sy hou twee vingers in die lug vir die kruisteken van die Ougelowiges, wat deur patriarg Nikon vervang is deur ’n teken met drie vingers.

Feodosija Prokopjewna Morozowa (Russies: Феодосия Прокопьевна Морозова; 1632-1675) was een van die belangrikste lede van die Russiese Ougelowiges.

Sy word as die dogter van Prokopi Feodorowitsj Sokownin gebore en trou op 17-jarige ouderdom met die bojaar Gleb Morozof, ’n broer van Boris Morozof, die voog van tsaar Aleksei van Rusland. Nadat haar eggenoot in 1662 op ’n jong leeftyd gesterf het, kry sy ’n hoë posisie aan die Russiese hof.

In die tyd van die skeuring (raskol) in die Russies-Ortodokse Kerk sluit Feodosija, wie se biegvader die invloedryke aartspriester Awwakoem Petrof is, aan by die teenstanders van die kerkhervormings en word in die geheim ’n non met die naam Theodora. Sy speel ’n belangrike rol daarin om haar suster, prinses Jewdokija Oeroesowa, te oorreed om by die teenstanders van die hervormings aan te sluit.

Bojarinja Morozowa is diep gelowig en nadat sy ’n non geword het, wil sy nie meer haar verpligtinge aan die hof vervul nie, veral omdat die tsaar die kerkhervormings steun. Sy haal haar die woede van tsaar Aleksei op die hals wat haar op verskeie geleenthede probeer oorreed om die hervormings te aanvaar. Hy laat haar uiteindelik arresteer en in kettings uit die Moskouse Kremlin sleep.

Na haar arrestasie word sy en haar suster Jewdokija gemartel en op verskillende plekke aangehou. Hulle word daarna in ’n ondergrondse gevangenis in Borofsk, 180 kilometer suid van Moskou, aangehou waar albei uitgehonger word totdat hulle sterf. Feodosija is op 1 Desember 1675 dood. Baie Ougelowiges vereer haar en haar suter as martelare vir die ou geloof.

Sien ook[wysig]

Ougelowiges
Awwakoem Petrof