Bybelse gids - Boas en Rut
Hierdie rustige verhaal uit die gewone lewe vorm 'n skerp teenstelling met die oorlog en stryd van Rigters, hoewel dit in dieselfde tyd afspeel. Baie mense het in hierdie tyd wel 'n normale vreedsame lewe gely. Hoewel die godsdienstige lewe oor die algemeen 'n laagtepunt bereik het, stel die boek Rut dit duidelik dat die persoonlike geloof van baie in Israel sterk gebly het. Die mees opvallende kenmerk van hierdie eenvoudige en pragtige verhaal is die bewussyn van God se noue betrokkenheid by die alledaagse lewe. Hy is die Een wat al die omstandighede van die gewone lewe reël, selfs vir die geringstes onder die geringes. Hy weef die nuutgevonde geloof van Moabitiese vrou en haar opofferende liefde vir haar skoonmoeder in die groot tapisserie van sy reddingsplan. Want koning Dawid is Boas en Rut se agterkleinkind, en uit die stam van Dawid is die Messias gebore.
Rut het gekwalifiseer vir die swaershuwelik, maar aangesien daar nie 'n swaer was nie, kon dit nie toegepas word nie. Rut maak egter staat op die lossingsreg wat in daardie tyd gegeld het.
Elimelek neem sy gesin na Moab[wysig | wysig bron]
In die tyd van die leiers was daar op 'n keer hongersnood in die land en 'n man met sy vrou en sy twee seuns het uit Betlehem in Juda weggetrek om 'n heenkome te soek in die gebied van Moab.[1] Die man was Elimelek en sy vrou Naomi en sy twee seuns Maglon en Kiljon. Hulle was afkomstig uit Efrata in Betlehem in Juda. Hulle het in Moab aangekom en hulle daar gevestig. Die reis was sowat 80 kilometer ver.
Toe Naomi se man Elimelek sterf het sy en haar twee seuns alleen agtergebly. Die twee seuns het later getrou met die Moabitiese meisies Orpa en Rut. Naomi en haar seuns het omtrent 10 jaar in Moab gebly. Toe haar twee seuns Maglon en Kiljon ook sterf het sy alleen agtergebly sonder haar seuns en sonder haar man. Toe sy verneem dat die Here vir sy volk uitkoms gebring het deur vir hulle goeie oes te gee, het sy en haar skoondogters klaargemaak om van Moab af terug te gaan. Sy en haar skoondogters het saam vertrek uit die plek waar hulle gebly het op pad na Juda toe.
Orpa het besluit om in Moab agter te bly, maar Rut het besluit om saam met haar skoonma Betlehem toe te gaan.
Naomi en Rut keer terug na Betlehem[wysig | wysig bron]
Die hongersnood was verby. God het weereens getoon dat hy vir sy volk sorg. Maar Rut wil Naomi nie alleen laat oud word nie. Sy kies die volk van Naomi, en betekenisvol, die God van Naomi. Die twee kom in April in Betlehem aan.[2]
Rut gaan are optel en wen Boas se beskerming[wysig | wysig bron]
Daar was nie baie maniere waarop weduwees 'n bestaan kon maak nie, en Rut en Naomi was arm. Maar die wet[3] het bepaal dat by die oes los are vir die armes gelaat moet word. "Toevallig" behoort die land waar Rut are optel aan Boas, Elimelek se familielid. Sy vriendelikheid strek veel verder as wat die wet vereis.[4]
Die dorsvloer; die beroep op Boas as familielid[wysig | wysig bron]
Ingevolge die Levietiese wet[5] was die broer van 'n man wat kinderloos gesterf het, verplig om by sy weduwee 'n erfgenaam te verwek. Hierdie wet is uitgebrei na die naaste familielede, van daar Naomi se plan. Deur haar optrede in vers 7, eis Rut hierdie reg. Die saak word egter meer ingewikkeld gemaak deur die feit dat Boas nie werklik Elimelek se naaste familielid is, nie maar hy belowe om haar te steun.
Die ooreenkoms tussen die familielede[wysig | wysig bron]
Die stadspoort was die plek waar belangrike byeenkomste gehou is, en dit was ook die plek waar regsake in die openbaar geskik is. Die oudstes van die stad het as getuies opgetree.[6] Behalwe om 'n erfgenaam te verwek om die gestorwe man se naam voort te dra, moes die familielid ook sy grond koop en dit in die familiebesit hou. Boas bespreek eers die grond, dan die weduwee. Die familielid is bereid om die grond te koop om dit by sy erfporsie te voeg. Maar wanneer hy hoor dat die land aan Rut en haar seun sal gaan en dat hy vir Rut sal moet sorg, verklaar hy dat hy dit nie kan koop nie.
Rut trou en word die oorgrootmoeder van koning Dawid[wysig | wysig bron]
God gee dat Boas self sy gebed van 2:12 vervul, en beloon Rut met die gawe van 'n eggenoot en 'n seun, en Naomi vind vertroosting in haar kleinseun. God se ingrype gee aan die alledaagse gebeure van die lewe buitegewone betekenis. Die kind Obed word die grootvader van koning Dawid, uit die koningshuis van Israel stam, waaruit Christus gebore is - ook in Betlehem.
Verwysings[wysig | wysig bron]
Bronne[wysig | wysig bron]
- Die Bybel Nuwe Vertaling Bybelgenootskap van SA
- Handboek by die Bybel David en Pat Alexander Lux Verbi