Chanel Nº 5

in Wikipedia, die vrye ensiklopedie
Jump to navigation Jump to search
Chanel Nº 5

Chanel Nº 5 is 'n damesparfuum uit die Franse modehuis Chanel wat op 5 Mei 1921 in Parys deur die Franse modeskepper Coco Chanel (1883−1971) as die eerste aldehied-parfuum geloods is, oorspronklik net vir 'n klein groep uitgesoekte klante. Die parfuum was die eerste in 'n reeks geure wat deur Chanel op die mark ingevoer is en word as die suksesvolste damesparfuum ooit beskou. Volgens Parfums Chanel word daar elke dertig sekondes êrens op aarde 'n flessie Chanel Nº 5 verkoop. Die flessie maak deel uit van die geur se bekoring en aantrekkingskrag. Die ikoniese Amerikaanse aktrise Marilyn Monroe (1926−1962) het die parfuum na bewering as haar enigste nagkleed gedra.

Die chemiese formule vir die parfuum – 'n oordosis van 'n 1:1:1-akkoord van die aldehiede C-10 (decanal), C-11 (undecanal) en C-12 (dodecanal) – is deur die Frans-Russiese skeikundige en vroeëre parfumeur aan die Russiese tsarehof, Ernest Beaux (1881−1961), ontwikkel. Altesaam 130 bestanddele is vir Chanel Nº 5 gebruik.[1]

Chanel Nº 5 en die Sowjetunie se gewildste damesparfuum, Rooi Moskou, staan sentraal in die geskiedkundige werk Der Duft der Imperien uit die pen van een van Duitsland se voorste Rusland-kenners, die historikus Karl Schlögel. Albei parfuums het hul oorsprong in 'n reukwater wat in voor-rewolusionêre Rusland ter gelentheid van die Romanof-dinastie se 300-jarige troonjubileum in 1913 ontwikkel is.[2]

Verwysings[wysig | wysig bron]

  1. Nigel Groom: The New Perfume Handbook. Second edition. London • Weinheim • New York • Tokyo • Melbourne • Madras: Blackie Academic & Professional 1997, bl. 61
  2. MDR Kultur: Sachbuchkritik – Karl Schlögel riecht sich durch die Sowjet-Geschichte. Besoek op 25 Februarie 2020

Eksterne skakels[wysig | wysig bron]

Media