Coco Chanel

in Wikipedia, die vrye ensiklopedie
Coco Chanel
Coco Chanel in 1928
Gebore
Gabrielle Bonheur Chasnel

(1883-08-19)19 Augustus 1883
Sterf10 Januarie 1971 (op 87)
Parys, Frankryk
NasionaliteitVlag van Frankryk Frankryk
BeroepModeontwerper
Ouer(s)Eugénie Jeanne Devolle
Albert Chanel

Gabrielle Chanel, beter bekend as Coco Chanel (1883–1971), was ’n Franse modeontwerper wat die modehuis Chanel begin het en ook bekendheid verwerf het met parfuums soos Chanel Nº 5. Haar klere-ontwerpe het ’n groot invloed op 20ste-eeuse modes gehad. Sy is veral bekend vir haar eenvoudige tweestukpakke vir vroue en die "klein swart nommertjie".[1]

Lewensloop[wysig | wysig bron]

'n Flessie Chanel Nº 5-parfuum (1924)
Chanel se "klein swart nommertjie".

Gabrielle Bonheur Chanel is op 19 Augustus 1883 op die Franse dorpie Saumur, Maine-et-Loire, buite die eg gebore. Na haar ma se dood en pa se daaropvolgende verlating is sy eers deur twee tantes in Auvergne en daarna deur nonne in die Aubazine-weeshuis grootgemaak. Sy het haar eerste betrekking, dié van naaldwerkster, gelos om 'n beroep as nagklubsangeres te beproef.)[2]

In daardie tyd het sy die minnares van Etienne Balsan, 'n miljoenêrkavallerie-offisier, geword en hy het haar eerste hoedewinkel in 1909 gefinansier. Haar volgende minnaar, Balsan se vriend Arthur Capel, het haar uitbreiding van hoede tot klere in plekke soos Parys, Deauville en Biarritz gefinansier.

Chanel het die eerste keer tydens die Eerste Wêreldoorlog bekendheid verwerf toe sy werksklere ontwerp het, gebaseer op haar eie eenvoudige klere, vir die vroue wat die mans wat gaan veg het se werk oorgeneem het. Sy het hobbelrokke vervang met reguit rokke, mansoortrektruie, matroosbaadjies en eenvoudige truistofrokke. Die meeste vroue het haar nuwe styl verwelkom en teen die middel twintigerjare was die Chanel-voorkoms die norm.

Deur die volgende paar dekades het haar bekendheid toegeneem en het sy bekend geword vir 'n verskeidenheid nuwe style, waaronder kort haarstyle, sigeunerrompe, kostuumjuweliersware, blink aanddrag, kort swart rokkies, oophakskoene en kwilthandsakke. Sy het verder gegaan en die eerste ontwerperparfuum, Chanel Nº 5, bekend gestel en dit het haar suksesvolste produk geword.

In 1939, toe Frankryk oorlog teen Duitsland verklaar, het sy haar modehuis gesluit en in 1945 is sy na Switserland verban oor haar verhouding met die Nazi-offisier Hans Gunther von Dincklage. Sy het haar modehuis eers in 1953 weer oopgemaak, toe sy haar gedistilleerde Chanel-voorkoms weer bekend gestel het in eenvoudige, gemaklike vorms van sagte tweeds, gedra saam met kostuumjuweliersware. Haar nuwe pakkies was dadelik gewild by die Amerikaners en teen 1959 was haar bekende Chanel-pakkies 'n "noodsaaklikheid" vir elke welgeklede vrou.

Sy het aangehou werk en was besig met voorbereidings vir haar 1971-versameling toe sy skielik op 10 Januarie 1971, op die ouderdom van 87, in haar privaatkwartiere in die Ritz-hotel in Parys oorlede is.

Belangrikste prestasies[wysig | wysig bron]

'n Ritz-hotel word weerkaats in die toonvenster van 'n Chanel-winkel

Gabrielle "Coco" Chanel, elegante Franse mode-ontwerpster wat die duidelike grense tussen manlike en vroulike kleredrag laat vervaag het, het 'n klein modewinkeltjie omskep in een van die mees winsgewende moderyke van alle tye en het een van die 20ste eeu se invloedrykste modetoonaangewers geword. Alhoewel sy nie haarself as 'n feminis wou beskryf nie, het sy 'n moderevolusie begin wat vroue bevry het van korsette en wat eenvoud en gemak elegant gemaak het.

Sy het praktiese klere soos broeke vir vroue, matroosbaadjies, oortrektruie, sportklere en laehakskoene gewild gemaak en 'n omwenteling teweeggebring in die tekstielbedryf deur die eerste ontwerper te wees wat woltruie in vrouedrag gebruik. Sy het ook haar eie toebehorelyn begin wat kostuumjuweliersware aanvaarbaar gemaak het. Haar suksesvolste produk was egter nie klere nie, maar haar bekende Chanel No 5-parfuum, die wêreld se eerste ontwerpergeur wat in 1923 bekendgestel is.

Alhoewel sy in 1971 oorlede is, bestaan haar ryk, die House of Chanel, wat ten tyde van haar dood meer as $160 miljoen per jaar verdien het, steeds voort en sal die modewêreld vir nog baie jare daardeur beïnvloed word.

Verwysings[wysig | wysig bron]

  1. HAT Taal-en-feitegids, Pearson, Desember 2013, ISBN 978-1-77578-243-8
  2. "Madamoiselle Chanel: the perennially fashionable". Chanel. Besoek op 13 Oktober 2006.

Eksterne skakels[wysig | wysig bron]