Community (Wallis)

in Wikipedia, die vrye ensiklopedie
Jump to navigation Jump to search
'n Kaart wat gemeenskappe in Wallis en burgerlike parogieë in Engeland wys

'n Community (Wallies: cymuned) of gemeenskap is die laagste vlak van plaaslike regering in Wallis. Administratiewe gemeenskappe in Wallis staan gelyk aan civil parishes of burgerlike (nie-kerklike) parogieë in Engeland. Tot so onlangs as 1974 was Wallis nog onderverdeel in civil parishes. Hierdie administratiewe eenhede is afgeskaf volgens seksie 20 (6) van die Wet oor Plaaslike Regering van 1972 (Local Government Act 1972) en vervang met communities, volgens seksie 27 van dié wet.

Anders as in Engeland, waar gebiede buite burgerlike parogieë geleë kan wees, word Wallis in sy geheel in communities onderverdeel, insluitende stedelike gebiede. Die meeste communities word deur gemeenskapsrade (community councils) bestuur wat ten opsigte van hul bevoegdhede en administratiewe praktyke met Engelse parogierade vergelyk kan word. Walliese gemeenskapsrade mag hulself eensydig tot dorpsrade (town councils) verklaar, terwyl die Kroon stadstatus aan hulle mag verleen. Derhalwe is alle dorpsrade in Wallis gemeenskapsrade.

Tans is daar meer as 730 gemeenskaps- en dorpsrade in Wallis met bevolkings wat wissel van minder as 200 tot meer as 45 000,[1] terwyl drie gemeenskappe stadstatus het: Bangor, St Asaph en St Davids. Die voorsitter van 'n dorps- of stadsraad dra gewoonlik die titel van burgemeester of mayor (Wallies: maer). Nie alle gemeenskappe word noodwendig deur 'n raad bestuur nie. Gemeenskappe met betreklik klein bevolkings mag gemeenskaps-byeenkomste reël vir administratiewe doeleindes. Daar is ook geen rade in die gemeenskappe van Wallis se drie grootste stedelike nedersettings Cardiff, Swansea en Newport nie.

Verwysings[wysig | wysig bron]