Construction Time Again

in Wikipedia, die vrye ensiklopedie
Spring na: navigasie, soek
Depeche Mode  —  Construction Time Again
Vrystelling

22 Augustus 1983

Etiket

Mute Records

Formate Viniel (1983 en 2007)
CD / DVD en SACD (2007)

PCM 2.0 (CD)

Dolby Digital 5.1,
Dolby Digital 2.0, DTS 5.1 (DVD)

DSD 2.0, DSD 5.1 (SACD)
Musiekstyl Synthie Pop
Speeltyd

42:10

Besetting
  • Dave Gahan
  • Martin Gore
  • Alan Wilder
  • Andrew Fletcher
Produsent(e)

Depeche Mode,
Daniel Miller

Ateljee(s)

The Garden Studios (Shoreditch/Londen)
Hansa Studio 2 (Berlyn)

Kroniek van Depeche Mode
A Broken Frame
(1982)
Construction Time Again Some Great Reward
(1984)
Portal.svg Musiekportaal

Construction Time Again is die derde ateljee-album van die Britse synthie-pop-groep Depeche Mode en die eerste waarvoor die groep van die nuwe samples-tegniek gebruik gemaak het: Verskillende metalliese geluide is as samples opgeneem en later by 'n mustiekstuk gevoeg. Een van die album se musiekstukke, Pipeline, bestaan selfs uitsluitlik uit samples, en sy lirieke het ook die album se titel opgelewer.

Depeche Mode het naas metaalgeluide ook 'n groot verskeidenheid alledaagse geluide as samples opgeneem, en net soos Construction Time Again is ook hul volgende albums deur hierdie sogenaamde "industriële musiekstyl" (Engels: Industrial Music) oorheers.

Construction Time Again is ook die eerste album waaraan Alan Wilder as 'n nuwe lid van die groep meegewerk het. Wilder het ook 'n aantal van musiekstukke, wat hy self geskryf het, vir die album voorgestel, en uiteindelik is twee hiervan - Two Minutes Warning en The Landscape Is Changing - deur die groep gekies en opgeneem. Die album is in John Foxx se Garden Studios-ateljee in Shoreditch (Londen) opgeneem en in die Berlynse ateljee Hansa Studio 2 afgemeng. Depeche Mode het ook hulle volgende albums in Berlyn afgemeng.

In 2007 is Construction Time Again saam met 'n bonus-DVD vrygestel. Die eerste kompakskyf is hermeester en (behalwe vir die Verenigde State) as 'n CD/SACD-hibriedskyf vrygestel.

Die bonus-DVD bevat die B-kante en die enkelsnit en B-kant van Get the Balance Right, 'n enkelsnit-titel wat 'n kort tyd voor die album opgeneem is, asook 'n dokumentêr, waarin Get the Balance Right en Construction Time Again, die album se twee enkelsnitte, die ontstaangeskiedenis van die omslag, die lirieke, en die album se sampling-tegniek bespreek word. Daarnaas word ook die invloed wat Alan Wilder as 'n nuwe lid van die groep en Gareth Jones as die nuwe klankingenieur op Depeche Mode se nuwe "industriële" musiekstyl uitgeoefen het. Die dokumentêr bied ook uittreksels van die Get the Balance Right-musiekvideo wat voorheen nog nie vrygestel is nie.

Die Collectors Edition het op 20 Maart 2007 in die VSA, 26 Maart in die Verenigde Koninkryk en 2 April in die res van Europa verskyn. Die hermeesterde album is daarnaas in Europa ook as 'n "deluxe" viniel-langspeelplaat vrygestel.

Depeche Mode se werkersklas-estetiek[wysig]

Die fotografie wat vir die omslag gebruik is in die Alpe geneem en sluit by die vorige album A Broken Frame se buitengewone styl aan. Maar terwyl die twee vorige albums Speak and Spell en A Broken Frame se lirieke meer op 'n persoonlike vlak geskryf is, maak Depeche Mode met Construction Time Again vir die eerste keer daarop aanspraak om ook 'n politieke groep met 'n boodskap te wees.

Volgens die fotograaf Brian Griffin het hy en die groep saamgestem dat die omslag weer 'n landskapfoto soos by A Broken Frame sou bevat, maar hierdie keer met 'n fabriekwerker. Griffin had al vroeër omslagfotos vir die Britse popgroep Echo and the Bunnymen geneem met strande en gletsers as agtergrond en besluit om hierdie soort motiewe ook vir Depeche Mode se nuwe langspeler te gebruik. Die broeder van een van sy assistente, wat vroeër in die Koninklike Britse Vloot gedien het, het vir die opnames model gestaan. Die fotos is met die Frans-Italiaanse bergspits Mont Blanc as agtergrond geneem, en die model het met 'n voorhamer geposeer.

Die "werkers-foto" is baie bypassend tot Martin Gore en Alan Wilder se lirieke, waarin die nywerheidswêreld, klasverskille en omgewingsbewaring behandel word. Gore se bydraes het daarnaas 'n baie melancholiese karakter.

In die Britse politieke klimaat van die 1980's is popgroepe wat in sukses en geld belanggestel het, dikwels as "regsgesinde reaksionêre" beskryf, terwyl kunstenaars met 'n sosiale gewete as "pseudo-kommunisties" afgestempel is. X-More, 'n lid van die linksgesinde Britse groep The Redskins en skrywer van die tydskrif New Musical Express, het die album as 'n politieke manifes geïnterpreteer en Depeche Mode in 'n onderhoud selfs as comrades ("kamerade") aangespreek.

Maar alhoewel die omslagfoto se styl aan die werkersklas-estetiek van die sosialistiese realisme ontleen is, versinnebeeld dit slegs die album se titel en Depeche Mode se besluit om van Construction Time Again hul eerste album in die industriële musiekstyl te maak - met lirieke wat uitdrukking aan hulle sosiale gewete gee. Die groep het duidelik ontken dat die album 'n spesifieke politieke boodskap dra of enigsins kritiek lewer op die beleid van die destydse konserwatiewe Britse regering onder die eerste minister Margaret Thatcher, wat onder meer daarop gefokus was om die politieke invloed van vakbonde te verminder.

Eksterne skakels[wysig]

Bronne[wysig]

  • Construction Time Again. Collectors Edition (2007)
  • Malins, Steve: Depeche Mode - A Biography. Londen: André Deutsch Limited 1999