Shoreditch

in Wikipedia, die vrye ensiklopedie
Shoreditch
Stadsdeel
Broadgate Tower, Shoreditch High Street
Broadgate Tower, Shoreditch High Street
Shoreditch is in Groter Londen
Shoreditch
Shoreditch
Koördinate: 51°31′34″N 0°04′41″W / 51.52611°N 0.07806°W / 51.52611; -0.07806
LandVlag van Verenigde Koninkryk Verenigde Koninkryk
Land Engeland
GraafskapGroter Londen
BoroughHackney
TydsoneUTC±00:00 (MGT)
 • SomertydUTC+01:00 (BST)
Poskode
EC1, EC2
Skakelkodes020
Old Street Roundabout

Shoreditch is 'n distrik in die historiese East End van Londen en die huidige Sentraal-Londen. Die buurt, wat net noord van die City of London geleë is, behoort administratief aan die London Borough of Hackney, een van 32 boroughs of administratiewe distrikte in Groter Londen.

Geografie[wysig | wysig bron]

The Three Crowns Pub, Shoreditch

Shoreditch se High Street en kerk word as die historiese hart van die distrik beskou. Oorspronklik is die distriksgrense deur die gelyknamige parogie bepaal, en so is ook die latere Metropolitan Borough of Shoreditch binne die historiese parogiale grense gevorm. Maar nadat die laasgenoemde plaaslike regeringsliggaam in 1965 ontbind is, het die grense tussen die verskillende buurte vloeiend geword. So word Hoxton, 'n buurt noord van Old Street, wat histories deel uitgemaak het van die parogie en latere borough, nog dikwels as deel van Shoreditch waargeneem.

Gentrifikasie het van Shoreditch en Hoxton, twee tradisionele werkersklasbuurte, sedert die middel van die 1990's gesogte woonplekke vir professioneles uit die kreatiewe en mediabedryf gemaak - 'n proses wat met vinnig stygende eiendomspryse gepaard gegaan het. Vroeëre nywerheidsgeboue is omgeskep tot kantoor- en woonstelgeboue, terwyl talle kunsgalerye, kroeë, restaurante en klubs (soos dié in Curtain Road en Old Street) geopen is.

Die transformasieproses is verder bevorder deur die opening van die Hackney Community College-kampus. Die tekort aan bouerwe in die City of London het reeds vanaf die 1980's daartoe gelei dat nuwe kantooreiendomme in Shoreditch opgerig is. Die Broadgate-projek met 35 verdiepings, wat in 2008 voltooi is, was destyds een van die grootstes van sy soort in Europa.

Die gebied is ook gewild by Londense internet-ondernemings soos Last.fm, Dopplr, Songkick, SocialGO en 7digital wat hul moderne hoofkwartiere rondom Old Street Roundabout gevestig het. Die Amerikaanse aanlynreus Amazon.com se Fashion Photography Studio is eweneens in Shoreditch gevestig.[1] Dikwels word die term Silicon Roundabout ingespan om na hierdie kwartier te verwys, soos byvoorbeeld deur die Britse premier David Cameron wat hierdie benaming in 2010 in 'n toespraak gebruik het.[2]

Kultuur[wysig | wysig bron]

Straatkultuur: 'n Groep musikante word begelei deur 'n jong trompetter. Columbia Market, Shoreditch

'n Minder bekende feit oor Shoreditch is dat Londen se eerste twee teaters hier opgerig is. Die eerste skouburg, wat in 1576 geopen is en net The Theatre genoem is, was op die hoek van Curtain Road en New Inn Yard geleë. Dit was die eerste permanente skouburg in heel Engeland en word verbind met James Burbage, die hoof van die graaf van Leicester se privaat teatergeselskap. Hy het sy teater in Shoreditch laat bou nadat die Lord Mayor van Londen die opvoering van toneelstukke binne die Londense stadsmuur verbied het. Opvoerings het oorspronklik onder meer in die binnehowe van herberge plaasgevind. The Theatre was 'n groot veelhoekige gebou wat in 1598 volgens die bepalings van sy pagkontrak weer afgebreek moes word.

Die tweede skouburg in Shoreditch, The Curtain Theatre, was in Hewett Street geleë en is later deur dieselfde bestuurders bestuur as The Theatre. Dit word as die historiese voorloper van The Globe Theatre op Londen se Southbank beskou. Volgens oorlewering het William Shakespeare in Shoreditch as akteur in toneelstukke opgetree en hier in Bishopsgate en moontlik ook Holywell Street gewoon. Van sy eerste bekende toneelstukke, waaronder Romeo en Juliet, is hier opgevoer. In 2012 is oorblyfsels van die teater deur deskundiges van die Museum of London Archaeology (MoLA) opgegrawe.[3]

Die vroeëre varieté-teater Shoreditch Empire Theatre (ook bekend as The London Music Hall), wat in High Street geleë was, word met 'n bekende persoonlikheid uit die vermaakwêreld verbind - Charlie Chaplin het hier opgetree voordat hy na die Verenigde State geëmigreer het.[4]

Ambagte[wysig | wysig bron]

In die laat 19de en vroeë 20ste eeu het vakkundige meubelmakers hul werkswinkels in Shoreditch geopen. Tot die meubeldryf se agteruitgang in die 1980's was die vervaardiging en groothandel vir meubels vir die Britse en oorsese markte in Shoreditch gekonsentreer. Intussen is baie werkswinkels omgeskep tot kantore, kroeë, restaurante en sogenaamde leef-en-werkeenhede (live/work units).[5] Die plaaslike tradisie van meubelmakery en die verskillende meubelstyle in Engeland vanaf omstreeks 1600 word gedokumenteer in die Geffrye Museum in Kingsland Road.

Verwysings[wysig | wysig bron]

  1. Amazon in the UK. Besoek op 13 November 2018
  2. "Duncan Geere op www.wired.co.uk: Transcript: David Cameron sets out Britain's hi-tech future. Besoek op 14 Oktober 2014". Geargiveer vanaf die oorspronklike op 21 Augustus 2014. Besoek op 14 Oktober 2014.
  3. The Guardian, 6 Junie 2012: Shakespeare's Curtain theatre unearthed in east London. Besoek op 15 September 2014
  4. (en) arthurlloyd.co.uk: Shoreditch Theatres and Halls. Besoek op 10 April 2020
  5. Joanna Smith en Ray Rodgers: Behind the Veneer: The South Shoreditch Furniture Trade and Its Buildings. Swindon: English Heritage 2006. 'n PDF-uitgawe van die boek mag hier afgelaai word: historicengland.co.uk: Behind the Veneer

Eksterne skakels[wysig | wysig bron]

Toerisme en vermaak

Eiendomme en leefstyle