Die Bywoners

in Wikipedia, die vrye ensiklopedie

Die Bywoners was ’n Afrikaanse toneelgeselskap wat in Johannesburg gestig is deur die akteurspaar Schalk Jacobsz en Elma Potgieter.[1]

Die geselskap het in 1981 die eerste vertaling van Athol Fugard se Hello and Goodbye onder regie van Jan Engelen in die Markteater opgevoer met die titel Hallo en Koebaai. Ander stukke sluit in Die Eensame Vlug, Potgieter se eenvrouvertoning Darling Blossom, Die Wildsboudjie deur Fritz Steyn, Corlia Fourie se Hoer of Heilige, Moervrug (’n verwerking van Engemi Ferreira se novelle Die Jaar toe my Ma begin Sing het), Laetitia Kom Terug (’n klugtige eenvrouvertoning wat Elma geskryf het) en Fugard se Boesman en Lena. Jacobsz het baie van die stukke se regie gedoen of self daarin gespeel.[2]

Op 27 September 2000 het Die Bywoners weer ná ’n ruk die teaterdeure in ’n gehuurde saal in Braamfontein geopen met die produksie Sol y Sombra (Son en Skaduwee), ’n aand van Uys Krige-poësie.[3]

Jacobsz en Potgieter is albei later deur die ATKV Centurion vereer vir hul bydrae oor meer as drie dekades tot Afrikaanse toneel.[2]

Verwysings[wysig | wysig bron]