Dietrich Mateschitz

Dietrich Mateschitz (20 Mei 1944 – 22 Oktober 2022), ook bekend as Didi Mateschitz, was 'n Oostenrykse entrepreneur en miljardêr. Sy onderneming Distribution & Marketing GmbH is in besit van 49 persent van die aandele van Red Bull GmbH, die vervaardiger van die wêreld se gewildste kafeïen-bevattende koeldrank Red Bull.

Lewe

Red Bull GmbH se hoofkwartier in Fuschl am See in die deelstaat Salzburg.

Mateschitz het 'n akademiese graad by die Hochschule für Welthandel (Universiteit vir Wêreldhandel) in Wene verwerf. Daarna was hy onder meer as handelsverteenwoordiger vir Jacobs Kaffee (tans 'n handelsmerk van Mondelēz International) en die tandepastavervaardiger Blendax werksaam.

Red Bull

In 1984 het Mateschitz saam met sy Thailandse vennote Chaleo en Chalerm Yoovidhya die onderneming Red Bull GmbH gestig. Hulle het die resep vir 'n gewilde Thailandse koeldrank, Krating Daeng, aangepas en 'n bemarkingkonsep ontwikkel wat op die jeugmark en sportgeesdriftiges gefokus is. In 1987 is hul kafeïendrank Red Bull op die mark bekend gestel wat binne enkele jare tot die leidende handelsmerk op die wêreldmark van kafeïen-bevattende energiedranke gegroei het. Red Bull is tans die bekendste Oostenrykse handelsmerk.

Min is oor Mateschitz se privaatlewe bekend. In 1993 is 'n seun vir hom gebore.

Volgens die tydskrif Forbes Magazine was Mateschitz se fortuin op VS$ 13,4 miljard beraam wat hom die rykste Oostenryker gemaak het. Op die lys van die wêreld se rykste mense was hy in 2017 op 86ste geranglys.