Donga (Tydskrif)

in Wikipedia, die vrye ensiklopedie

Donga was 'n Suid-Afrikaanse veeltalige literêre tydskrif wat in breëbladkoerantformaat uitgegee is tussen 1976 en 1978. Die tydskrif is deur 'n groep jonger Afrikaanse skrywers gestig wat nou geassosieer was met die Taurus uitgewer. Donga is deur Welma Odendaal en Rosa Keet voorgestel wat ook aanvanklike meeste van die redigeerwerk behartig het. Donga was uitdruklik teen Apartheid gekant. Dit het nie-realistiese literêre vorms, Marxisme-georiënteerde style van kulturele kommentaar en nuwe opkomende skrywers ondersteun. Dit was ook gekant teen die gevestigde liberale tradisie.[1]

Die vierde uitgawe van Donga is deur die staat verban toe besware teen die morele aard van die tydskrif gemaak is. Die jong skrywer en akademikus Mbulelo Mzamane het by die redaksie aangesluit wat gelei het tot noue bande met Medupe, die kortstondige Swart skrywersgroep wat in 1977 gevorm is. In die sesde uitgawe van Donga is die tydskrif se verbintenis met Medupe aangekondig wat die aandag van die Veligheidspolisie op Donga sou laat fokus. Odendaal is ondervra en haar huis en die Donga se drukker is deursoek. Die polisie het die sewende uitgawe by die Publikasieraad ingehandig. Op 7 Oktober 1977 is bepaal dat die Septemberuitgawe verban moes word omdat dit "obseen", "skadelik vir rasseverhoudinge" en "opruiend" was. Die volgende uitgawe was toegewy aan Breyten Breytenbach wat op daardie stadium gevangenisstraf vir aanklagte van terrorisme uitgedien het. Toe dit aan die raad voorgelê is, is dit en alle toekomstige uitgawes van die blad verban.[1]

Die uitgewers het gepoog om hulle projek aan die lewe te hou deur onmiddellik 'n opvolg publikasie genaamd Inspan uit te gee. Dit sou egter net vir twee uitgawes oorleef voor dit ook verban is.[1]

Verwysings[wysig | wysig bron]

  1. 1,0 1,1 1,2 Peter D. McDonald, The Literature Police: Apartheid Censorship and Its Cultural Consequences, uitgegee deur Oxford University Press, 2009, ISBN 0199283346, 9780199283347