Electronic Frontier Foundation

in Wikipedia, die vrye ensiklopedie
EFF Kenteken
Die EFF gebruik die bloulint as simbool vir die stryd ter verdediging van vryheid van spraak.

Die EFF (Electronic Frontier Foundation) is 'n organisasie sonder winsbejag in die V.S.A wat hom beywer tot die behoud van vryheid van spraak soos vervat in die Eerste Amendement van die Verenigde State se grondwet in die konteks van die hedendaagse digitale wêreld. Die hoofdoel van die organisasie is om die pers, beleidsmakers en die algemene publiek oor burgerregtekwessies wat verband hou met tegnologie in te lig en tree ook op as verdediger van daardie regte. Die EFF steun op lidmate se skenkings en is gesetel in San Francisco, Kalifornië, maar het ook personeel in Toronto, Ontario en Washington, D.C..

Die EFF neem aksie op verskeie maniere:

  • Verskaffing van fondse vir verdediging in die howe
  • Om indiwidue en nuwe tegnologieë te beskerm teen die effek van dreigemente van wetlike vervolging wat volgens die organisasie sonder behoorlike gronde is
  • verskaf riglyne vir die regering en howe
  • die reël van politieke- en massaposveldtogte
  • ondersteuning van nuwe tegnologieë wat hulle glo persoonlike vryhede beskerm
  • die onderhou van 'n databasis en webwerf met verwante nuus en inligting
  • monitering en die uitdaag van wetgewing wat hulle glo inbreuk sal maak op persoonlike vryhede en billike gebruik
  • die saamstel van 'n lys van gevalle wat hulle sien as patentmisbruik met die oogmerk om dié eise wat sonder meriete is te verslaan

Geskiedenis[wysig | wysig bron]

Mitch Kapor, stigterslid van die EFF

Die EFF is deur Mitch Kapor, John Gilmore en John Perry Barlow in 1990 gestig. Die stigters het mekaar almal op 'n aanlyn orum ontmoet.

Die skepping van die organisasie is gemotiveer deur die deursoek en beslaglegging op die eiendom van Steve Jackson Games deur die Verenigde State se geheime diens vroeg in 1990. Verskeie ander strooptogte is deur die federale regering se taakspan genaamd Operasie Sundevil uitgevoer rondom die tydperk, maar Steve Games se geval was die EFF se eerste hoë profiel geval gewees en die spil waarom dinge gedraai het toe die EFF burgerregte op rekenaars en die internet begin bevorder het. Die EFF se tweede groot saak was dié van Bernstein teen die Verenigde State en is gelei deur Cindy Cohn. In hierdie geval het 'n programmeerder en professor Daniel Bernstein 'n saak teen die Amerikaanse regering aanhangig gemaak om toestemming te kry om sy koderingsagteware genaamd Snuffle en die meegaande beskrywing van hoe dit werk te publiseer. Meer onlangs was die organisasie betrokke by die verdediging van Edward Felten, Jon Johansen en Dmitry Sklyarov.

Boeke en verwysings[wysig | wysig bron]

Boeke wat die EFF se geskiedenis in diepte behandel vanuit 'n beleids- en wetlike oogpunt sluit in:

  • Robert B. Gelman & Stanton McCandlish's Protecting Yourself Online: The Definitive Resource on Safety, Freedom & Privacy in Cyberspace.
  • Mike Godwin se Cyber Rights: Defending Free Speech in the Digital Age.
  • Verskeie ander boeke uit die 1990's (Bruce Sterling se The Hacker Crackdown, ens.) behandel ook die EFF se aktiwiteite tot 'n mate. Hul meer onlangse werk op die gebied van billike gebruik en intellektuele eiendom wetgewing word beter op hul webwerf en joernale gedokumenteer.

'n Ander verwysing kan ook hier gevind word:

Hoofondersteuners[wysig | wysig bron]

  • Op 18 Februarie, 2004, het die EFF aangekondig [1] dat dit $1,2 miljoen uit die boedel van Leonard Zubkoff ontvang het. Hulle het onderneem om $1 miljoen van hierdie geld te gebruik om 'n fonds te stig ten behoewe van Digitale Burgerregte.
  • Die EFF ontvang dikwels gratis regshulp van Prof. Eben Moglen.
  • Lawrence Lessig: EFF raadslid en professor te Stanford
  • Raadslede: Brad Templeton (voorsitter), John Perry Barlow, John Gilmore, David Farber, Joe Kraus, Lawrence Lessig, Pamela Samuelson en Brewster Kahle.

Kritiek[wysig | wysig bron]

In sommige kringe word geglo dat die EFF hoër prioriteit aan grootskaalse veranderinge aan wetgewing ondersteun (soos die wettiging van moontlik ongemagtigde handel in lêers oor eweknie netwerke) as om die misbruik van die wet te keer (soos in die geval van patentmisbruik en DMCA klagtes).

Die EFF se suksesse ter verdediging van Skylink en OPG teen misbruik van DMCA-wetgewing in die V.S.A asook hul projek om patente te daag demonstreer 'n daadwerklike poging om misbruik van wetgewing te voorkom.

Sommige mense in gemeenskappe wat elektroniese gemorspos teenstaan kritiseer die EFF dat hulle amptelik sekere tegnieke teenstaan wat gemik is om gemorspos te verhoed. Die EFF se redenasie is dat die besluit oor wat gemorspos verteenwoordig altyd by die ontvanger moet lê en nie by tussengangers soos internet diensverskaffers nie en dat daar doeltreffende gemorspos filters aan die eindgebruiker beskikbaar is.

Geskiedenis, mylpale en sake[wysig | wysig bron]

  • 1990: Stigting van die organisasie en die aanvoorwerk gelê vir die suksesvolle verdediging van Steve Jackson Games in 'n Federale Hof in Amerika om die Verenigde State se geheime diens te vervolg vir die onwettige strooptog op hul kantore en die beslaglegging op hul rekenaars.
  • 1990 Mike Godwin sluit by die organisasie aan as eerste raadgewende personeellid
  • 1991 Esther Dyson en Jerry Berman sluit by die EFF Raad aan.
  • 1991 Steve Jackson Games maak 'n saak in die Federale hof teen die geheime diens van die V.S.A aanhangig.
  • 1992 Die EFF maak hul eerste EFF Pioneer Toekenning by die tweede Computers, Freedom, and Privacy konferensie in Washington, DC
  • 1992 Cliff Figallo aangestel as die nuwe direkteur van EFF-Cambridge
  • 1992 Desember – Jerry Berman aangestel as Waarnemende Uitvoerende Direkteur
  • 1993 Steve Jackson Games wen hul saak teen die geheime diens.
  • 1993 "Big Dummy's guide to the Internet" 'n Gids vir die private gebruik van die internet word aanlyn beskikbaar gemaak om gratis afgelaai te kan word.
  • 1993 Oktober – Stanton McCandlish sluit by die organisasie aan as aanlyn aktivis.
  • 1994 Drew Taubman benoem as Uitvoerende Direkteur.
  • 1994 Die Center for Democracy and Technology word deur Jerry Berman gestig.
  • 1995 Die Bernstein teen die Verenigde State hofsaak.
  • 1995 Die EFF verskuif na San Francisco
  • 1995–1996 Die EFF begin sy "Blue Ribbon Veldtog" in reaksie op die Communications Decency Act
  • 1996 Die EFF is medestigters van TRUSTe, die eerste Privaatheidseël maatskappy saam met CommerceNet, 'n nywerheidskonsortium sonder winsbejag.
  • In 1998, bou die EFF Deep Crack, 'n masjien wat 'n DES-gekodeerde boodskap na slegs 56-ure ontsyfer het en wen daarmee RSA Security se DES Uitdaging.
  • In 1999 loods EFF en Anonymizer die Kosovo Privaatheidsprojek, 'n anonieme en veilige epos en websnuffeldiens wat deur Alex Fowler en Patrick Ball bedink is om mense in Kosovo, Serbië en andere te beskerm wat oor die Oorlog in Kosovo berig het teen wraakaanvalle van Serbiese amptenare.
  • Professor Edward Felten: DMCA word gebruik om sy navorsing oor die ontsyfering van die Secure Digital Music Initiative (SDMI) uitdaging te sensor.
  • November 2002: Die 2600: The Hacker Quarterly Tydskrif saak, Universal teen Reimerdes. Die EFF verloor sy appél voor die Appèlhof in die V.S.A.
  • November 2002: Die 2600: The Hacker Quarterly Tydskrif saak, 2600 Tydskrif word verhoed om skakels na die DeCSS kode te publiseer onder die bepalings van die DMCA-wetgewing.
  • Ondersteun pogings om 'n databasis daar te stel oor die misbruik van intellektuele eiendom wetgewing en om moontlike slagoffers in te lig.
  • Desember 2003: RIAA teen Verizon, Die EFF ondersteun Verizon in 'n suksesvolle teenstaan van 'n laer hof se beslissing wat bepaal dat die maatskappy die identiteit van 'n Verizon kliënt moet bekendmaak wat daarvan beskuldig is dat hy kopiereg geskend het deur lêers te deel op 'n eweknie netwerk met KaZaA sagteware. Die Appèlhof het met Verizon en die EFF saamgestem en bepaal dat die spesiale dagvaarding bepalings van die DMCA wetgewing van toepassing is op materiaal wat op 'n internet diensverskaffer se rekenaar gestoor is en nie op materiaal wat op 'n indiwidu se eie rekenaar gestoor is nie.
  • 2004: DirecTV teen Treworgy. Die EFF help om die eienaar van "smart card" tegnologie Mike Treworgy te verdedig nadat DirecTV 'n hofgeding teen hom aanhangig gemaak het op gronde daarvan dat hy hardeware aangeskaf het wat gebruik kon word om die maatskappy se satellietseine te onderskep. Treworgy het sy saak gewen en die Appèlhof het beslis dat DirecTV nie gedinge aanhangig kan maak teen mense vir die blote besit van smart-card tegnologie nie. In afsonderlike onderhandelinge met DirecTV het die EFF daarin geslaag om die maatskappy te kry om sy "skuldig-by-aankoop" strategie te laat vaar.
  • 19 April 2004: Word die Patent Busting Projek geloods om patente wat deur die organisasie gesien word as misbruik van die wetgewing om vindingrikheid in nie-kommersiële toepassings en klein ondernemings te onderdruk of daarop gemik is om vryheid van spraak te onderdruk.
  • Mei 2004 ACLU teen Ashcroft. Ondersteun die ACLU se teenstaan van die grondwetlikheid van wetgewing wat die FBI in staat stel om internet diensverskaffers te dwing om kommunikasie rekords te hou sonder om juridiese oorsig te vereis. In September 2004, is die wetgewing geskrap.
  • Augustus 2004: Chamberlain teen Skylink. Die EFF staan Skylink by in hul verdedeging by die Appélhof van die V.S.A. Chamberlain het die bepalings van DMCA wetgewing probeer afdwing om te verhoed dat Skylink 'n universele afstandbeheer verkoop wat ook met Chamberlain se motorhuisdeure kon werk. Die hof het Chamberlain se eise van die hand gewys en daarop gewys dat as die hof Chamberlain se interpretasie van die DMCA-wetgewing sou aanvaar dit baie wettige gebruike van sagteware binne elektroniese en rekenaarprodukte sou bedreig.
  • 19 Augustus, 2004: 'n Nederlaag [2] in die MGM teen Grokster[3] saak. Fred von Lohmann van die EFF was die hoofregsverteenwoordiger vir Streamcast Networks. Die EFF het aanvanklik hulle hofsaak gewen deur te betoog dat tegnologie wat betekenisvolle wettige toepassings het, nie verantwoordelik gehou kan word vir kopieregmisbruike deur die gebruikers van sulke tegnologie nie. Die hooggeregshof het egter die bevinding omgekeer en bevind dat die verdediging verantwoordelik is vir die kopieregskendings.
  • 6 Oktober, 2004: In samewerking met 8 ander openbare belangegroepe word 'n vertoog saamgestel [4] waarin die Federal Communications Commission se gesag om die broadcast flag mandaat uit te voer teengestaan word.
  • 15 Oktober, 2004: Suksesvolle verteenwoordiging van die ISP Online Policy Group (OPG) en twee Swarthmore College studente wat groot sekuriteitsflaters in die Diebold Verkiesingsmasjiene gepubliseer het. Diebold is daarvan beskuldig dat hulle die eerste maatskappy was wat seksie 512 (f) van die DMCA-wet oortree het deur iemand met vervolging te dreig terwyl hulle terdeë daarvan bewus was dat 'n oortreding nie plaasgevind het nie.
  • 2004: JibJab Media teen Ludlow Music, die EFF het JibJab die skeppers van 'n parodie animasie waar hulle gebruik maak van Woody Guthrie se "This Land Is Your Land"—en bewyse ontdek dat die volksliedjie reeds in die publieke domein is.
  • November 2004: Dien 'n vertoog in wat die Federal Communications Commission se voorstel teenstaan om die Communications Assistance for Law Enforcement Act wetgewing uit te brei na breëband Internet dienskverskaffers en VOIP stelsels.
  • Desember 2004: Begin om die Tor anonimiteitsnetwerk te bevorder en te ondersteun, 'n tweede generasie Uieskilnetwerk wat mense in staat stel om anoniem te kommunikeer.
  • Junie 2005: Reik 'n regsgids uit vir Webjoernaalskrywers, wat ontwerp is om 'n basiese gids te wees oor hoe om wetlike aspekte as joernaalskrywer aan te spreek en om hulle bewus te maak van hulle regte.
  • Oktober 2005: Doen 'n ondersoek en dokumenteer die wyse waarop die Xerox DocuColor drukker se reeksnommer, sowel as die datum en tyd van die drukstuk op 'n herhaalde 15 by 8 kol patroon op die geel kanaal van gedrukte blaaie geënkodeer word. Die EFF werk daaraan om ander drukkers ook met terugwaartse ingenieurswese te ontsyfer.
  • November 2005: EFF saam twee ander regsfirmas, maak 'n saak aanhangig teen Sony BMG Music Entertainment, en eis dat die maatskappy die skade wat aangerig is deur First4Internet XCP en SunnComm MediaMax sagteware herstel wat hulle op 24 miljoen musiek CD's ingesluit het.
  • Januarie 2006 (Hepting teen AT&T): EFF maak 'n saak aanhangig teen AT&T waarin hulle beweer at AT&T die NSA moontlik toegelaat het om al sy kliënte op die internet af te luister asook oor die VOIP kommunikasie.

Verwysings[wysig | wysig bron]

Publikasies[wysig | wysig bron]

Eksterne skakels[wysig | wysig bron]