Faun (musiekgroep)

in Wikipedia, die vrye ensiklopedie
Jump to navigation Jump to search
Faun
FAUN live 03.jpg
O. Pade en E. Pawelke tydens die Wave-Gotik-Treffen in Leipzig in 2007
OorsprongGräfelfing, Beiere, Duitsland
Genre(s)Pagan Folk
Dark Wave
Middeleeuse musiek
Aktiewe jare1999 - hede
EtiketteCurzweyhl/Rough Trade
Banshee Records/AL!VE
Universal
Webwerfhttp://faune.de
LedeOliver "SaTyr" Pade
Niel Mitra
Fiona Rüggeberg
Rüdiger Maul
Sonja Drakulich
Stephan Groth
Gewese ledeBirgit Muggenthaler
Werner Schwab
Elisabeth Pawelke
Sandra Elflein
Rairda
AssosiasiesSchandmaul
FaunLogo.svg
Portal.svg Musiekportaal

Faun is 'n Duitse musiekgroep wat in 2002 in Gräfelfing naby München gevorm is en Pagan Folk-, Dark Wave- en middeleeuse musiek speel. Die gebruik van historiese instrumente en die gesang met lirieke in 'n verskeidenheid tale, waaronder Duits, Latyn, Grieks en Skandinawiese tale, dra by tot die oorspronklikheid van hul musiekstyl. Hul musiekinstrumente sluit Keltiese harp, Sweedse nyckelharpa, hurdy gurdy (pierment), doedelsakke, sister, fluite en baie ander in.

Musiekstyl[wysig | wysig bron]

Faun in lewende lywe in Gelsenkirchen

Oorspronklik het Faun na konserte, waartydens hul musiek elektronies versterk is, as "Paganfolk" verwys. Later is dié term deur aanhangers en groeplede uitgebrei om ook na hul spesifieke musiekstyl te verwys.

Faun se repertoire strek van melancholiese ballades tot vrolike dansliedere soos die Bretonse An Dro, waarby enersyds historiese liedere uit verskillende tydperke en streke volgens Faun se styl getoonset word, andersyds ook eie liedere gekomponeer word. So word byvoorbeeld ou Persies-Arabiese wysies met Sweedse nyckelharpa-klanke en Middelhoogduitse sangtekste voorgedra. 'n Ander kenmerk is tweestemmige stukke en Niel Mitra se drywende slagwerkritmes in meer onlangse opnames.

Faun se debuutalbum Zaubersprüche ("Towerspreuke") het in tematiese opsig veral rustige ballades uit die periode tussen die laat middeleeue en die Romantiek behandel. Dit is uitsluitlik met akoestiese instrumente getoonset. Die tweede langspeler, Licht ("Lig"), bevat minder balladeagtige liedjies, maar 'n groter aandeel dansbare musiekstukke soos Andro, Unda of die dubbellied Deva/Punagra. Op die derde album Renaissance staan die tematiek van dood en hergeboorte sentraal. Dié konsep is met fasetryke musiekstukke verwesenlik waarvan baie steeds op Faun se huidige konserte gespeel word, soos Da Que Deus, Rhiannon, Rosmarin, Iyansa en Tagelied.

Die vierde album Totem se stukke handel oor die oorkoming van afgronde en die helpers wat 'n mens op daardie reis het. Ter bekendstelling van die nuwe album het Faun 'n konserttoer onderneem en 'n DVD van die konserte vrygestel. In musikale opsig het Faun met liedjies soos 2 Falken en Gaia nuwe terrein betree. 'n Beperkte albumuitgawe van 1 000 eksemplare is van 'n begeleidende teks en 'n akoestiese weergawe van 2 Falken voorsien. In vergelyking met die ander albums bevat Totem die grootste aandeel self gekomponeerde liedjies.

Op die volgende langspeler Buch der Balladen staan Duitse ballades sentraal wat almal met akoestiese instrumente getoonset is. Die Duitse Nibelungen-heldedig het as konsep vir die album gedien. 'n Beperkte uitgawe van die album met sy liedjies oor watergeeste, trolle en betowerde ridders bevat 'n bonussnit, Brynhilds Lied, en 'n verhaal van tien minute oor Siegfried, die drakedoder, en sy geliefde wat met ligte ritmes, mondtrommel en nyckelharpa begelei word.

Die langspeler Eden, wat in 2011 vrygestel is, is aan mitologiese paradysverhale uit verskillende beskawings en tydperke gewy. Vir die musiek is historiese instrumente met moderne elektroniese ritmes gekombineer.

Die album Von den Elben, wat vroeg in 2013 uitgereik is, is deur volks- en middeleeuse rockklanke beïnvloed, 'n konsep wat by sommige aanhangers min aanklank gevind het. Oliver Pade was genoodsaak om 'n webblad op Facebook te laai waarop hy die nuwe styl van die album verduidelik.

Diskografie[wysig | wysig bron]

Langspelers[wysig | wysig bron]

  • 2002: Zaubersprüche (Curzweyhl/Rough Trade)
  • 2003: Licht (Curzweyhl/Rough Trade)
  • 2005: Renaissance (Curzweyhl/Rough Trade)
  • 2007: Totem (Curzweyhl/Rough Trade)
  • 2008: Faun & The Pagan Folk Festival – Live (feat. Sieben & In Gowan Ring) (Banshee Records/AL!VE)
  • 2009: Faun Acoustic – Buch der Balladen (Banshee Records/AL!VE)
  • 2011: Eden (Banshee Records/AL!VE)
  • 2013: Von den Elben (We Love Music/Universal)

DVDs[wysig | wysig bron]

  • 2004: Lichtbilder (Curzweyhl/Rough Trade)
  • 2007: Ornament (Curzweyhl/Rough Trade)

Eksterne skakels[wysig | wysig bron]

Media