Florisbad
Florisbad is ‘n wêreldbekende argeologiese vindterrein en navorsingstasie in die Vrystaat.
Ligging
[wysig | wysig bron]Hierdie terrein lê aan die oewer van die soutpan Haagenstadpan en die Modderrivier, noordoos van die Krugersdriftdam en noord van die Soetdoringnatuurreservaat. Dit is by 28° 46′ 5″ suid, 26° 4′ 6″ oos, 1269 m bo seespieël en nagenoeg by die kruising van die R700- en die R703-paaie, 37 km suidoos van Dealesville, 45 km noordwes van Bloemfontein en 47 km suidwes van Brandfort.
Terrein
[wysig | wysig bron]Die terrrein is plaaslik meer om sy louwarm fontein bekend. Dit dra die naam van Floris Venter, ‘n vorige eienaar wat die warm bron oopgestel het aan die publiek. Duisende mense het glo verligting van rumatiek verkry as hulle bedek is met die warm modder. Ossewaens het die plek graag as uitspanning gebruik. In 1910 het ‘n nuwe fontein onverwags begin borrel en groot hoeveelhede fossiele blootgelê. Reeds sedert 1912 toe dr. Robert Broom hier fossiele van soogdiere en klipwerktuie beskryf het, is Florisbad as fossielterrein bekend. Maar in 1930 het dit internasionaal bekend geraak toe prof. T.F. Dreyer ‘n primitiewe mensskedel, die Florisbadman, hier ontdek het. Die terrein is in 1995 tot monument verklaar.
Latere vondste
[wysig | wysig bron]In 1952 is meer as 3000 fossiele en 1000 klipwerktuie gevind. Sedert 1980, toe die staat die perseel met die vakansieoord oorgeneem het, is navorsers van die staatsmuseum in Bloemfontein voltyds besig met verdere navorsing en opgrawings. ‘n Verskeidenheid soogdierreste is saam met die mensskedel gevind en hierdie fossiele word as verteenwoordigend van die Laat Pleistoseen van suidelike Afrika beskou, ‘n tydperk van ongeveer 100000 tot 125000 jaar gelede. Hoewel dit te oud is vir radio-koolstofdatering, word hierdie soogdiermatriaal en die mensskedel as minstens 100000 jaar oud beskou. Die Florisbadsoogdierreste dui op ‘n besondere ryk omgewing met ‘n prominente grasveldkomponent, maar bevat ook ‘n element wat dui op die nabyheid van standhoudende water. Dit verwys na tye van hoër reënval toe die soutpan waarskynlik ‘n meer was. Buiten navorsingswerk wat op die fossiele gedoen word, is die opgrawings by Florisbad op die Middelsteentydlae gefokus. Hierdie lae is reeds ouer as 40000 jaar en kan die metode van radiokoolstofdatering ook nie gebruik word nie. Hulle is waarskynlik jonger as die Florisbadmensskedel.
Persoon
[wysig | wysig bron]- Thomas Frederick Dreyer (*Koeberg, 7 Mei 1884 - †Bloemfontein, 13 Julie 1954), dierkundige, paleontoog, argeoloog, antropoloog, professor aan die Universiteit van die Vrystaat
Sien ook
[wysig | wysig bron]Bibliografie
[wysig | wysig bron]- artefacts.co.za/main/Buildings/bldgfames_mob.php?bldgid=17097
- nationalmuseum.co.za/florisbad-quaternary-research-station/
- sa-venues.com/things-to-do/freestate/florisbad
- showmesa.co.za/florisbad-museum-and-research-centre-soutpan/