Franklin Larey

in Wikipedia, die vrye ensiklopedie
Jump to navigation Jump to search

Franklin Larey word as een van Suid-Afrika se mees bekwame en luisterryke pianiste beskou. Larey is bekend om sy uitvoerings van die werke van Brahms, Mozart, Scriabin en Ravel.

Larey speel dikwels solo stukke, en verskyn ook dikwels as begeleier. Hy het saam met dirigente soos Isaiah Jackson, Gabriel Chmura, Bernard Gueller, Victor Yampolsky, Christopher Dowdesville en Lesley Dunner verskyn. Die San Jose Mercury News het soos volg oor sy uitvoerings saam met die San Jose Simfonieorkes geskryf, "Toe Franklin (Larey) hom na sy sag-verweefde poësie gewend het, het die tyd stil gestaan, en die gehoor het vir wat gevoel het soos 'n ewigheid, hul asems in gewyde verwagting ingehou. Sy stadige beweging was loutere ekstase, vol selfversekerheid, en liries."[1] Sy onderwysers sluit Gideon Slingers, Bruce Gardiner, Laura Searle, Frank Weinstock en Richard Fields in.

Franklin Larey het reeds verskeie pryse gewen, insluitende eerste prys tydens die 1991 Young Chang Internasionale Klavierkompetisie, en derde prys tydens die 1996 New Orleans Internasionale Klavierkompetisie. In 2003 is 'n gesogte Fulbright Navorsingstoegif aan hom toegeken en het hy ses maande by sy alma mater, die Universiteit van Cincinnati in-residensie spandeer. Larey het verskeie eerbewyse vir sy werk as konsertpianis ontvang, asook vir sy bydrae tot musiek in Suid-Afrika. Die Universiteit van Cincinatti se Kollege-Konservatoria van Musiek het hom geëer met die instansie se Uitgelese Alumnus Toekenning. In Suid-Afrika het hy op die Nasionale Kunsteraad gedien, 'n dokumentêre prent oor sy lewe was op televisie uitgesaai en hy het verskyn in Suid-Afrika se Menslike Wetenskappe Navorsingsraad se gepubliseerde reeks, Living Treasure. In 2005 was hy aangestel tot die Fakulteit van die Adamant Musiekskool in Vermont (VSA). Larey gee onderrig by die Universiteit van Kaapstad waar hy van 2002 tot 2007 gedien het as Direkteur van die Suid-Afrikaanse Kollege van Musiek.[2]

Verwysings[wysig | wysig bron]

  1. Vrye vertaling vanaf Engels na Afrikaans.
  2. Inligting bekom van CD inligtings-voubiljet. Plate-etiket,Klavierhaus.