Freikorps

in Wikipedia, die vrye ensiklopedie
Freikorps in 1783

Die benaming Freikorps (Duits vir "Vrykorps") is oorspronklik van toepassing op vrywillige leërs. Die eerste Freikorps is deur Frederik II van Pruise gedurende die Sewejarige Oorlog gebruik. Freikorps het ook gedurende die Napoleontiese Oorloë gefunksioneer en is onder andere deur Ludwig Adolf en Wilhelm von Lützow gelei. Die Freikorps is as onbetroubaar deur die bevelvoerders van staande leërs beskou. In die algemeen is hulle hoofsaaklik gebruik as wagte en vir mindere take.

Die betekenis van die woord het egter mettertyd verander. Na 1918, is die term gebruik vir ver-regse paramilitêre organisasies wat in Duitsland tot stand gekom het, gestig deur Duitse soldate wat na Duitsland verslaan is in die Eerste Wêreldoorlog, teruggekeer het. Die Freikorps was een van baie paramilitêre groepe aktief gedurende die tyd in die Weimar Republiek. Verskeie Duitse veterane het vervreemd gevoel van die siviele lewe en by die Freikorps aangesluit in 'n soeke na stabiliteit binne 'n militêre struktuur.

Ander was kwaad oor die onverwagse en skynbaar onverklaarbare nederlaag van Duitsland. Die Freikorps het aktief steun verleen om die kommunistiese opstande in Duitsland en Europa teen te staan. Hulle het heelwat steun van Gustav Noske, die Duitse Minister van Verdediging ontvang wat van hulle gebruik gemaak het om die Sparta Liga met geweld te onderdruk, insluitende die moorde op Karl Liebknecht en Rosa Luxemburg op 15 Januarie 1919. Hulle is ook gebruik om die stigting van die Beierse Sowjetrepubliek in 1919 tot niet te maak.

Verskeie Freikorpse het deelgeneem in gevegte in die Baltiese state, Silesië, en Pruise na die einde van die Eerste Wêreldoorlog. Hoewel die Freikorps amptelik ontbind is in 1920, het lede nog steeds 'n prominente rol in die opkomende ver-regse politieke mag in Duitsland gespeel.

Sommige toekomstige lede en selfs leiers van die Nationalsozialistische Deutsche Arbeiterparte (NSDAP) of Nazi-party was lede van die Freikorps, insluitende Ernst Röhm, toekomstige hoof van die Sturmabteilung of SA, en Rudolf Höß, die toekomstige Kommandant van Auschwitz. Van die Freikorps soos die Oberland Liga gelei deur Dr. Friedrich Weber het deel gevorm van die Kampfbund. Die Kampfbund was 'n liga van "patriotiese" gevegsverenigings in Beiere wat onder die politieke leiding van Adolf Hitler gestaan het gedurende die vroeë 1920's en aan die begin van Hitler se politieke loopbaan sy steun onder die ver-regses begin bou het.

Sommige van die Freikorps-ondersteuners het nie Hitler gesteun nie. Hermann Ehrhardt en sy ondergeskikte Kommandant Eberhard Kautter, leiers van die Viking Liga, het byvoorbeeld geweier om Hitler en Ludendorff met hul Biersaal-staatsgreep te help en het selfs teen hulle saamgesweer. Verskeie Freikorps-lede het buitestanders gebly gedurende die tydperk van Nazi Duitsland. 'n Algemene besprekingsonderwerp onder Freikorps veterane was, "Waar was Hitler in 1919/20, toe ons teen die Kommuniste geveg het?".