Gereformeerde kerk Randburg-Oos

Mev. Breggie en ds. Naas du Plessis, predikantpaar van 1977 tot 1983, toe hy oorlede is in die amp.

Die Gereformeerde kerk Randburg-Oos was ’n kortstondige gemeente van die Gereformeerde Kerke in Suid-Afrika wat in 1976 van Randburg afgestig het, maar op 13 April 2003 ontbind het om weer deel van die moedergemeente te word. Dit was nadat Johannesburg-Melville aan die einde van die vorige jaar by Randburg-Oos ingelyf is.

Die gemeente is in Mei 1976 afgestig, maar die band tussen moeder en dogter het altyd heg gebly, want in die hele 27 jaar lange bestaan van Randburg-Oos het dié gemeente altyd gebruik gemaak van Randburg se kerkgebou op die hoek van Main- en Hilltopstraat, Bordeaux. Die gemeentes se bedieningsgebied was groot en het met die afstigting van Randburg-Oos snelontwikkelende stadsgebiede soos Sandton, Blairgowrie, Ferndale en Witkoppen ingesluit.

Die twee gemeentes het in Januarie 1997 hul gesamentlike eiendom verkoop en tydelik in ’n skoolgebou bymekaargekom. In Augustus daardie jaar het hulle saam die nuwe gemeentesentrum in Derdeweg, Northwold, betrek. Vyf jaar voor die gemeentes een geword het, het Randburg-Oos 322 belydende lidmate en 63 dooplidmate gehad en Randburg onderskeidelik 496 en 140, oftewel gesamentlik 818 en 203. Einde 2014 het die belydende lidmate 1 408 getel en die dooplidmate 610, in die geval van die belydende lidmate twee en ’n half keer meer as die naasgrootste gemeente in die Klassis Groter Johannesburg, Linden.

Predikante

1. Du Plessis, Willem Jacobus Ignatius Michael, 1977 – 15 Augustus 1983 (oorlede in die amp)
2. De Klerk, Barend Jacobus, 1984 – 1987
3. Venter, dr. Andries Gerhardus Schutte, 1987 – 29 April 2001
4. Van 't Zand, Jan Douwe, 1992 – 1999
5. Hattingh, Christiaan, 2001 – 2003, waarna Randburg tot sy aftrede in 2007

Bronne

• (af) Harris, C.T., Noëth, J.G., Sarkady, N.G., Schutte, F.M. en Van Tonder, J.M. 2010. Van seringboom tot kerkgebou: die argitektoniese erfenis van die Gereformeerde Kerke. Potchefstroom: Administratiewe Buro.
• (af) Van der Walt, dr. S.J. (voorsitter: deputate almanak). 1997. Die Almanak van die Gereformeerde Kerke in Suid-Afrika vir die jaar 1998. Potchefstroom: Administratiewe Buro.
• (af) Venter, ds. A.A. 1957. Almanak van die Gereformeerde Kerk in Suid-Afrika vir die jaar 1958. Potchefstroom: Administratiewe Buro.
• (af) Vogel, Willem (red.). 2014. Die Almanak van die Gereformeerde Kerke in Suid-Afrika vir die jaar 2015. Potchefstroom: Administratiewe Buro.

Eksterne skakels

• (en) Die gesamentlike kerkgebou van Randburg en Randburg-Oos, sedert 2003 net Randburg, by Derdeweg 41, Northwold, Randburg. URL besoek op 13 Desember 2015.