HMS Belfast

in Wikipedia, die vrye ensiklopedie
Die HMS Belfast.

Die HMS Belfast is 'n ligte kruiser wat op 17 Maart 1938 te water gelaat is deur die Britse Vloot.

Geskiedenis[wysig | wysig bron]

Die skip is in Belfast, Noord-Ierland deur Harland and Wolff gebou. Die kiel is gelê op 10 Desember 1936 en hy is in diens gestel op 5 Augustus 1939. 'n Paar maande nadat dit in diens geneem is, het die skip 'n seemyn getref in die Firth of Forth, Skotland. Dit is ernstig beskadig deur die magnetiese myn en herstelwerk het tot November 1942 geduur voor dit weer aan operasies kon deelneem. Hy is ook toegerus met die nuutste radartegnologie. Daarna het hy gehelp om die konvooie na Rusland te beskerm en het 'n sleutelrol gespeel in die Slag van Noord-Kaap waar die Scharnhorst gekelder is. Die Belfast het ook deelgeneem aan die D-dag landings in Junie 1944 te Normandië. Hy het ook deelgeneem aan die Koreaanse Oorlog.

Tussen 1956 en 1959 het die skip modernisering ondergaan en was hierna die vlagskip in die Verre Ooste. In 1963 is hy uit diens onttrek en in reserwe geplaas.

Museum[wysig | wysig bron]

Sedert 1967 het die Britse Imperial War Museum met pogings begin om die skip te red nadat daar beoog is om hom op te breek vir skrootmetaal. Vroeg in 1971 is die HMS Belfast Trust gevorm en in September van daardie jaar is hy na sy ankerplek in die Teemsrivier gesleep as 'n drywende museum onder beheer van die Imperial War Museum.

Spesifikasies[wysig | wysig bron]

Hy het 10 553 ton water verplaas en was toegerus met:

  • Twaalf 6-duim (15.24 cm) kanonne
  • Twaalf 4-duim (10.16 cm) kanonne
  • Sestien lugafweer kanonne
  • Agt lugafweer masjiengewere
  • Twee 21-duim (53.34 cm) torpedobuise

Hy is aangedryf deur twee Parsons-turbines (80 000 dryfasperdekrag) wat hom teen 32 knope kon voortstu. Sy bemanning was 750 man groot. Hy is 187 meter (613 voet, 6 duim) lank, 20 meter (66 voet) breed en het 'n diepgang van 5,22 meter (17 voet, 3 duim).

Bron[wysig | wysig bron]