Hoër Seunskool Jeppe

	Hoër Seunskool Jeppe
Leuse	Forti Nihil Diffilcilius; ("Vir die dapper is niks te moeilik nie")
Gestig	1890
Tipe	Openbare en losies
Hoof	Anton Dempsey
Adjunkhoof(de)	M.H. Gill, C. Rattray
Stigter	Sir Julius Jeppe
Leerlinge	950
Grade	8–12
Adres	Good Hopestraat & Robertslaan
Stad	Johannesburg
Provinsie	Gauteng
Land	Suid-Afrika
Kleure	Swart wit goud
Koshuis(e)	Duiker, Eland, Impala, Koodoo, Roan
Webblad	www.jeppeboys.co.za

Die Hoër Seunskool Jeppe (amptelik Jeppe High School for Boys) is die oudste staatskool in Johannesburg en bied onderrig aan seuns van gr. 8 tot 12 deur die medium van Engels. Die skoolterrein is geleë aan Robertslaan in Kensington, Johannesburg, maar dit grens ook aan die voorstede Malvern en Jeppestown.

Volgens die skool se webtuiste was dit nog nooit ’n eliteskool nie, ten spyte van sy roemryke verlede. Die leerlingkorps het nog altyd uit uiteenlopende dele van die samelewing gekom.

Ontstaansgeskiedenis

Die geskiedenis van die Jeppe-skole is nou verweef met dié van Johannesburg. In 1890, net vier jaar ná die ontdekking van goud, het die Anglikaanse Kerke onder die besef van die groot behoefte aan onderwys vir die mynwerkers se kinders, die Sint Michael-kollege in Troyeville begin. Die gebou was geleë op die hoek van Crown en Commissionerstraat, waar die Junior School Fairview vandag nog staan, langs die pastorie, saal en kerkgebou van die NG gemeente Jeppestown, wat in 1897 gestig maar in 1992 ontbind is. In 1897 het die Witwatersrandse onderwysraad die skoolgeboue gekoop en is die skool tot die Jeppestown Grammar School herdoop.

Weens geldelike probleme moet die ouers self in 1898 verantwoordelikheid vir die skool aanvaar. Die skool was gedurende die Tweede Vryheidsoorlog gesluit en het in 1902 heropen. In 1903 het dit ’n staatskool geword, een van die sogenaamde "Milner-skole", en is herdoop tot die Jeppestown High School for Boys and Girls. Altesaam 170 personeellede en oudleerders het hul lewe in die twee Wêreldoorloë en die Grensoorlog verloor.

Skoolpersele

Die manjifieke klipgeboue wat die seunskool huisves, is in 1909 op grond gebou wat deur sir Julius Jeppe geskenk is. Dit is ontwerp deur die Skotse argitek John Ralston (1878–1955), ’n leerling van sir Herbert Baker. Die Voorbereidende Skool (Prep School) was ook eers ’n privaatskool en het die hoërskool se gebou in Troyeville betrek nadat die hoërskool na die nuwe perseel verhuis het. Bouwerk aan die nuwe Voorbereidende Skool het in 1916 begin op grond wat ook deur die Jeppe-familie geskenk is.

Met Johannesburg se eeufeesviering in 1986 is die seunskool se hoofgebou en die Eerste Wêreldoorlog-gedenkteken met sy koepeldak, wat veldmaarskalk Jan Smuts in 1926 onthul het, tot nasionale gedenkwaardighede verklaar.

Die oudste koshuis, Oribi House, is in 1912 gebou en vanaf 1916 is Tsessebe House gehuisves in Friedenheim, sir Julius se statige woning. Friedenheim, opgerig in 1895, het later aan sir Abe Bailey behoort en tydens die Tweede Vryheidsoorlog as Britse hoofkwartier gedien. Vroeg in die 1960’s is dit onveilig verklaar en gesloop. Die oudste geboue op die perseel, benewens die Friendenheim-stalle, wat nou as kleedkamers dien, is Roan House, voorheen Keith Hall, en Thabana of Sable House, wat in 1902 vir die Marx-familie gebou is. Dit het ’n indrukwekkende houttrap met gebrandskilderde glas.

Meisieskool

In 1919, ’n jaar ná die Tweede Vryheidsoorlog, is die meisieskool verskuif na sy nuwe perseel verder oos in Robertslaan en het die seunskool die Hoër Seunskool Jeppe (Jeppe High School for Boys) geword.

Skoolkleure en –wapen

Die skoolhoof James Humphrey Allen Payne (1905–1917) het die swart-en-wit skoolkleure voorgestel na aanleiding van sy alma mater, Trinity College, Cambridge. Die skoolwapen beeld ’n goudstaaf uit met wit strepe wat die Witwatersrand se erts voorstel.

Julius Jeppe

Sir Julius Jeppe was die skool se eerste vername weldoener en so is dit dan ook na hom genoem. Sy familie se van is verewig in die voorstad Jeppestown, wat hul sindikaat aangelê het, terwyl 'n kiesafdeling, Jeppes, ook na hulle genoem is. Hy is verkies tot die eerste beheerliggaam en het as voorsitter gedien van 1918 tot sy afsterwe in 1929. Hy is in 1922 tot ridder geslaan vir sy bydrae tot die gemeenskap nadat hy nie net betrokke was by die stigting van die drie Jeppe-skole nie, maar ook die stigting van die perdewedrenklub, die Randse Klub en die Johannesburgse Kinderhuis.