Troyeville

in Wikipedia, die vrye ensiklopedie
Troyeville
'n Woonstelblok in Troyeville
'n Woonstelblok in Troyeville
Troyeville is in Gauteng
Troyeville
Troyeville
 Troyeville se ligging in Gauteng
Koördinate: 26°11′56″S 28°3′58″O / 26.19889°S 28.06611°O / -26.19889; 28.06611Koördinate: 26°11′56″S 28°3′58″O / 26.19889°S 28.06611°O / -26.19889; 28.06611
LandVlag van Suid-Afrika Suid-Afrika
ProvinsieGauteng
MunisipaliteitStad Johannesburg
Oppervlak
 • Totaal0,61 km2 (0,24 vk. myl)
Bevolking
 (2011)[1]
 • Totaal4 154
 • Digtheid6 810/km2 (17 600/vk. myl)
Rasverdeling (2011)
 • Wit mense3.2%
 • Indiërs/Asiërs2.2%
 • Bruin mense4.1%
 • Swart mense89.1%
 • Ander1.3%
Taal (2011)
 • Zoeloe 28.7%
 • Engels 13.5%
 • Xhosa 7.1%
 • Sotho 5.3%
 • Ander 45.4%
Skakelkode011

Troyeville is 'n werkersklasvoorstad van Johannesburg, Suid-Afrika. Dit is in Johannesburg se F-streek geleë.

Ontstaan[wysig | wysig bron]

Troyeville is sowat 2 km oos van Johannesburg se stadsaal geleë. Dis een van die Goudstad se oudste voorstede en in 1891 aangelê deur Van Boeschoten en Lorentz, agente vir Barend Bezuidenhout van die plaas Doornfontein, en deur Lubbers, ’n Johannesburgse prokureur. Die landmeter was G.A. Troye, wat sy naam aan Troyeville sowel as aan Troyestraat gegee het.

Troyeville se strate ontleen hul name aan dié van die vroue en dogters van die Lubbers- en Lorentz-families: Jacoba, Cornelia, Eleanor, ens. Wilhelminastraat is in 1894 genoem na prinses Wilhelmina van Nederland.

Stadsbeplanning[wysig | wysig bron]

Die uitleg van die voorstad word beskryf as "een van die swakste voorbeelde van die roosterplan". Die straatblokke is almal reghoekig, sonder enige inagname van die natuurlike kontoere van die omgewing. Steil strate soos Appoloniastraat loop reguit op teen ’n heuwel, terwyl dit geleidelik daarteen kon uitgeloop het. Voor spoelriolering aangebring is, het die nagvuilwaens wat deur muile getrek is groot moeite gehad om die steiltes uit te kom, en wanneer hulle vol en swaar was, was die afdraande gevaarlik omdat hul remme nie die swaar vrag kon bestendig nie.

Die afwesigheid van enige wetenskaplike beplanning van voorstede soos Troyeville, Bertrams en Lorentzville was weens die geweldige druk van die snelgroeiende bevolking van Johannesburg. In die jare 1887–1897 het grondeienaars voorstede so gou moontlik aangelê met die enigste doel voor oë om soveel moontlik erwe in elke gebied in te druk. Geen parkies of speelterreine is voorsien nie. Dié siellose voorstede, as aaklige voorbeelde van wat nie gedoen behoort te word nie, het ten minste daartoe bygedra om ’n halfeeu later ’n bewustheid aan te wakker van die noodsaaklikheid van behoorlike stadsbeplanning.

Afrikaanse gemeenskap[wysig | wysig bron]

Troyeville het vroeër jare 'n groterige Afrikaanse gemeenskap gehuisves. Volgens die munisipale kieserslys was hier in 1934 304 Afrikaanse kiesers en 2 097 Engelse. IN1949 was dit 1 179 Afrikaans eb 2 075 Engels, maar teen 1961 het die Afrikaanse kiesers effens teruggesak tot 1 067 en die Engelse kiesers amper halveer tot net 1 111. Troyeville was die tuiste van 'n kerk van elk van die drie Afrikaanse Susterkerke. Die NG gemeente Jeppestown (1897) was op die grens tussen Fairview en Troyeville op die hoek van Corrie- en Op De Bergenstraat. Die Gereformeerde kerk Johannesburg-Oos (1930) se kerkgebou was om die hoek in Prinsesstraat en dié van die Hervormde gemeente Kensington (1929) drie straatblokke wes in Andriesstraat. Die NG gemeente het in 1992 met Malvern saamgesmelt, die Gereformeerde kerk het in 1986 deel geword van die gemeente Johannesburg en die Hervormde gemeente het in 2001 ontbind en die handjievol lidmate ingeskakel by die gemeente Johannesburg-Suid. Ook die plaaslike Afrikaanse laerskool, Johan Rissik, het ophou bestaan toe dit einde 1991 gesluit het en leerlinge begin 1992 oorgegaan het na die Laerskool Kensington, wat intussen verengels het.

Fotogalery[wysig | wysig bron]

Bronne[wysig | wysig bron]

Verwysings[wysig | wysig bron]

  1. 1,0 1,1 1,2 1,3 "Subplek Troyeville". Sensus 2011.


Hierdie artikel omtrent 'n plek in Johannesburg is slegs ’n saadjie. Jy kan Wikipedia help deur dit uit te brei.