John Gielgud

in Wikipedia, die vrye ensiklopedie
Jump to navigation Jump to search
Sir John Gielgud
'n Beeld van die betrokke persoonlikheid.
Gielgud in 1973, deur Allan Warren.

Geboortenaam Arthur John Gielgud
Geboorte (1904-04-14)14 April 1904
Sterfte 21 Mei 2000 (op 96)
Aktiewe jare 1922-2000

Sir Arthur John Gielgud OM CH (14 April 1904 – 21 Mei 2000) was ’n Britse akteur en teaterregisseur met ’n loopbaan wat oor agt dekades gestrek het. Hy, Ralph Richardson en Laurence Olivier was die driemanskap wat die Britse verhoog vir ’n groot deel van die 20ste eeu oorheers het.

Loopbaan[wysig | wysig bron]

’n Publisiteitsfoto van Gielgud vir die rolprent Secret Agent (1936).

Gielgud was lid van die Terry-teaterfamilie en het sy eerste betaalde rol in 1922 in sy niggie Phyllis Neilson-Terry se toneelgeselskap gekry. Nadat hy drama studeer het, het hy in repertoire-teater en die West End gewerk voordat hy in 1929–'31 in Shakespeare-stukke gespeel het.

In die 1930's was Gielgud in nuwe en klassieke werke in die West End en op Broadway te sien. Hy het ook toneelstukke begin regisseer en het sy eie geselskap in Londen gestig. Hy is deur baie beskou as die beste Hamlet van sy tyd[1] en was bekend vir komedierolle, soos dié van John Worthing in The Importance of Being Earnest. In die 1950's was hy lank bekend vir sy eenman-Shakespeare-stuk, The Ages of Man.

Hoewel hy sy rolprentdebuut in 1924 gemaak het, het hy rolprente lank nie ernstig opgeneem nie. Hy was al in sy 60's voordat hy werklik ’n rolprentloopbaan begin het. Tussen Becket in 1964, waarvoor hy sy eerste Oscar-benoeming gekry het, en Elizabeth in 1998 het hy in meer as 60 flieks verskyn. Vir sy rol van Hobson met die skerp tong in Arthur (1981) het hy die Oscar vir beste manlike byspeler gewen.

Gielgud het nie veel erg aan pryse gehad nie, en tog is hy een van min akteurs wat ’n Oscar, Emmy, Grammy en Tony gewen het. Hy was van die begin van sy loopbaan af bekend vir sy stem en meesterlike hantering van Skakespeare se werke.[2] Hy was tussen 1929 en 1994 in meer as 100 radio- en TV-dramas en het kommersiële opnames van baie toneelstukke gemaak, insluitende 10 van Shakespeare s'n. Hy is in 1953 tot ridder geslaan en die Gielgud-teater in die West End is na hom genoem.

Verwysings[wysig | wysig bron]

  1. Morley, Sheridan (2001). John G – The Authorised Biography of John Gielgud. Londen: Hodder and Stoughton. ISBN 0340368039. 
  2. Morgan, Charles. "The Gielgud Hamlet", The New York Times, 2 Desember 1934, p. X3 (subskripsie nodig)

Eksterne skakels[wysig | wysig bron]