Kango

Die Kango is ‘n landstreek net ten noorde van die dorp Oudtshoorn in die Suid-Kaap van Suid-Afrika.

Ligging

Hierdie gebied van nagenoeg 750 km² is suid van die 30° 20′ suiderbreedte en oos van die 22° oosterlengte. Dit is aan die suidelike helling van die Swartberge. In die gebied vloei die Kangorivier en die Grobbelaarsrivier, beide bolope van die Olifantsrivier. Schoemanshoek is die enigste beduidende nedersetting.

Ekonomie

Toerisme (met klem op die Kangogrotte en die Swartbergpas) en boerdery (veral met volstruise en uiesaad) is die vernaamste ekonomiese aktiwiteite. Voorheen was die kontrei ook bekend vir sy tabak, koring en okkerneute.

Geskiedenis

Philip du Pré het hom reeds in 1756 hier gevestig. Ook die voorvaders van Louis Trichardt, Koos de la Rey en Louis Botha het hier geboer.

Naam

Kango is waarskynlik ‘n vervorming van die Khoi-woord !a-!kanub, die vallei tussen die heuwels.

Lees ook

• Kangogrotte
• Lys van streeksname in Suid-Afrika

Bibliografie

• Raper, P.E.: Streekname in Suid-Afrika en Suidwes. Kaapstad: Tafelberg, 1972. ISBN 0-624-00182-2
• Slingsby, Peter: Exploring the Swartberg and Klein-Karoo. www.slingsbymaps.com, 2011. ISBN 978-1-919900-94-0