Karringmelk

in Wikipedia, die vrye ensiklopedie
Volmelk (links) en karringmelk (regs)
Karringmelk is 'n belangrike bestanddeel vir 'n verskeidenheid soet nageregte soos karringmelkpastei (hier bedien met vrugte en 'n bros pekanneutkors)

Karringmelk is 'n geurige, suur melkdrank wat as neweproduk van bottervervaardiging ontstaan. Danksy die baie lae vetgehalte van minder as een persent is karringmelk een van die gesondste suiwelprodukte en 'n belangrike bron van proteïne, kalsium, die vitamienaanvuller lesitien en melksuiker (laktose).

Geskiedenis[wysig | wysig bron]

Karringmelk word reeds sowat 4 500 jaar gelede in Indië, Mesopotamië en Egipte vervaardig. Gewoonlik is melk in houers, wat van bokleer, erdewerk of pampoene gemaak is, geskud tot die room (die bottervet) van die melk begin afskei. Die bottervet is daarna geklits en geknee totdat botter ontstaan - en tegelykertyd karringmelk begin uitvloei.

Karringmelk staan vroeg reeds as 'n verfrissende melkdrank bekend.

Later word bottervate gebruik om botter te vervaardig. Vandag word karringmelk op 'n meer higiëniese manier in houers van vlekvrye staal industrieel vervaardig. Vir 'n lang tyd kon karringmelk egter slegs binne 'n paar dae na sy bereiding geniet word, aangesien die laktobakterië die karringmelk vinnig begin versuur.

Teen die jaar 1970 begin 'n Duitse suiwelfabriek daarmee om eerder soetroom as suurroom vir die vervaardiging van karringmelk te gebruik en kan sodoende die houbaarheid van karringmelk tot sowat vier weke verleng. Met hierdie metode word soetroom-karringmelk versigtig verhit en deur middel van verdamping ontwater. Deur byvoeging van spesiale laktobakterië word die kenmerkende geurige, suur smaak van karringmelk verkry.

Karringmelk as skoonheidsmiddel[wysig | wysig bron]

Karringmelk is ook 'n gewilde skoonheidsmiddel, wat velprobleme kan versag. Die suurstof en swael van die karringmelkproteïene is byvoorbeeld noodsaaklik vir 'n gesonde, gladde vel.

Uitwendig aangewend, is karringmelk 'n geskikte natuurproduk om die vel skoon te maak en die seer van sonbrand uit te trek. Saam met eierwit dien karringmelk as 'n natuurlike skoonheidsmasker.

Karringmelk as bleekmiddel[wysig | wysig bron]

Nog tot en met 1770 is linne uitsluitlik met karringmelk gebleek.[1] Karringmelk (dikwels vermeng met suurlemoensap) kan as natuurlike en ongiftige bleekmiddel vir beide katoen en linne gebruik word.

Verwysings[wysig | wysig bron]

Eksterne skakels[wysig | wysig bron]