Kobus Burger

in Wikipedia, die vrye ensiklopedie

Kobus Burger is ’n joernalis en dramaturg en uitvoerende regisseur van drama by Radio Sonder Grense.

Lewe en werk[wysig | wysig bron]

Kobus Burger studeer vanaf 1991 tot 1994 joernalistiek aan die Universiteit van Stellenbosch. Hy word dan vanaf Januarie 1995 ’n kunsverslaggewer en musiek- en teaterresensent en later redakteur van Beeld se kuns- en vermaakbylae, Plus. Terselfdertyd word hy lid van die Kunstekabinet vir die Klein Karoo Nasionale Kunstefees (KKNK) en is hy ook beoordelaar vir die Nagtegaalprys. Hy word in 2007 deur dr. Eric Maisel, Amerika se voorste kreatiwiteitsafrigter, opgelei om kunstenaars van verskeie dissiplines te help om hulle kreatiewe potensiaal te bereik. In Augustus 2009 word hy aangestel as programbestuurder van die KKNK. In 2010 doen hy afstand van hierdie pos om hom toe te spits op sy skryfwerk, klasgee en ’n radioprogram. Hy hanteer ’n weeklikse teatergesprek op RSG Kuns en word in Mei 2012 aangestel as uitvoerende regisseur van drama by RSG. Hier is hy die stukrag agter die innoverende radio-kunstefees wat vanaf 2013 op RSG aangebied word. Hierdie fees word bekroon met ’n Fleur du Cap-teaterprys vir vernuwing en verower ook ’n innovasieprys van Business Arts South Africa (BASA). Op ’n deeltydse basis doseer hy ook joernalistiek aan die Universiteite van Johannesburg en Pretoria. In sy vrye tyd fasiliteer hy kreatiwiteitslypskole, wat hy reeds by onder andere die Grahamstad Nasionale Kunstefees en die Moshito-musiekkonferensie aangebied het. Hy bly in Johannesburg.

Skryfwerk[wysig | wysig bron]

Van sy gedigte en kortverhale word in Tydskrif vir Letterkunde gepubliseer. Sy eerste drama “Mara wie?” is in 2009 onder die vyf finaliste vir die toekenning van die Nagtegaalprys. Die drama word by die KKNK en Aardklop opgevoer en word beskryf as ’n spieël vir die samelewing wat veral kommentaar lewer op die vervlakking wat in die media plaasvind. Mara is ’n ouer, bekende aktrise wat nie normaalweg onderhoude toestaan nie. Kort voor haar sestigste verjaarsdag staan sy egter ’n onderhoud toe as guns vir ’n ou vriendin. Die onderhoud is met die jong onervare joernalis Jeandré, wat met haar hipermoderne geradbraakte taalgebruik en oppervlakkige kennis en ervaring nie opgewasse is vir die taak nie. Hulle is gou haaks met mekaar, want Mara ontbloot haar siel aan die poppie wat weinig insig het en haar met haar onsinnige vrae irriteer. Dan vertel Jeandré haar van haar grusame ondervindings as misdaadjoernalis en dit word duidelik hoe ernstig ’n mens kan mistas as jy op die uiterlike oordeel. Die titel verwys na Mara wat worstel met die vraag oor wie sy werklik is: die aktrise, een van haar karakters of ’n doodgewone mens wat doodgewone dinge doen, maar ook na die kortstondigheid van roem, sodat die bekendes van vandag more onsigbaar is. Hierdie drama word ook vir die radio verwerk en oor Radioteater op Radiosondergrense uitgesaai. In 2011 word dit bekroon met ’n ATKV Mediaveertjie vir beste radiodrama.

Eerbewyse[wysig | wysig bron]

In 2015 word Cordis-Trust se Orde van die Beiteltjie aan hom toegeken vir sy deurlopende ywer in die bevordering van die Afrikaanse woordkuns op Radiosondergrense.

Bronnelys[wysig | wysig bron]

Tydskrifte en koerante[wysig | wysig bron]

  • Bouwer, Anna-Retha “Resensent word geresenseerde met ‘Mara’” “Beeld” 15 September 2010
  • Opperman, A.J. “RSG-fees ‘verskuif klankgrense’” “Beeld” 4 November 2014
  • Stehle, Rudolf “Hulle kry Orde van die Beiteltjie” “Beeld” 16 Februarie 2015

Internet[wysig | wysig bron]