L.W.B. Binge

in Wikipedia, die vrye ensiklopedie
Ludwig Binge
Gebore
Ludwig Wilhelm Berthold Binge

20 Februarie 1919
Sterf15 Mei 1966
NasionaliteitSuid-Afrika
BeroepJoernalis, toneelkenner
Bekend virDie Ontwikkeling van die Afrikaanse Toneel

L.W.B. (Ludwig) Binge (1919–1966) was ’n Suid-Afrikaanse toneelkenner, resensent en 'n bestuurslid van die eertydse Nasionale Toneelorganisasie (NTO). Hy het die Ludwig Binge-beurs vir dramastudente aan die Universiteit van Pretoria ingestel. In 1969 verskyn sy boek, Ontwikkeling van die Afrikaanse toneel, postuum.[1]

Binge is die pa van Herman Binge, 'n vervaardiger van TV-reekse, onder meer oor die geskiedenis van die Afrikaanse teater. Herman en sy vrou, die aktrise Joanie Combrinck, se seun Ludwig is ook ’n akteur.

Lewensloop[wysig | wysig bron]

Ludwig Wilhelm Berthold Binge is op 20 Februarie 1919 in die distrik Potchefstroom gebore en hy matrikuleer aan die Hoërskool Jan van Riebeeck in Kaapstad.[2] Hy verwerf 'n BA- en MA-graad aan die Universiteit van Kaapstad, gevolg deur 'n doktorale studie oor die ontwikkeling van die Afrikaanse teater (aanvanklik aan die Universiteit van Kaapstad, wat hy in 1960 aan die Universiteit van Pretoria voltooi).

Ná sy MA-raad begin hy by die Vertaalburo in Pretoria te werk. Hy skryf deeltyds bydraes vir Die Burger en Die Transvaler, en word in 1945 as 'n drama-kritikus by Die Burger aangestel.

In 1949 word hy Suid-Afrika se eerste kultuurattaché by die ambassade in Nederland. Met sy terugkeer in 1955 vestig hy hom in Suidwes-Afrika (nou Namibië), waar hy as verteenwoordiger van Keetmanshoop tot die Wetgewende Vergadering verkies is.

Binge was tot 1961 'n bestuurslid van die Nasionale Toneelorganisasie (NTO) in Pretoria. Hy dien daarna as 'n reisende organiseerder vir die SA Kunsvereniging, waarna hy 'n pos as kunsredakteur by Die Transvaler aanvaar, en later ook kortliks by Die Vaderland werk.

Sy gesondheid het agteruit gegaan en hy sterf op 15 Mei 1966 aan 'n hartaanval, terwyl hy met voorbereidings vir daardie jaar se Republiekfees besig was. Sy doktorale studie, Die Ontwikkeling van die Afrikaanse Toneel (1832–1950), is na sy dood deur F.C.L. Bosman vir publikasie voorberei en in 1969 deur J.L. van Schaik uitgegee.[3] Die boek het 'n standaard handboek vir teaterstudie in Suid-Afrika geword.

Verwysings[wysig | wysig bron]

  1. HAT Taal-en-feitegids, Pearson, Desember 2013, ISBN 978-1-77578-243-8
  2. Profiel op ESAT, besoek op 7 Januarie 2017
  3. Ontwikkeling Van Die Afrikaanse Toneel, Van Schaik Uitgewers, ISBN 978-0-627-01028-6