London Borough of Hackney

in Wikipedia, die vrye ensiklopedie
Spring na: navigasie, soek
London Borough of Hackney
Die ligging van Hackney in Groter-Londen
Die ligging van Hackney in Groter-Londen
Politieke status
Land Vlag van Engeland Engeland
(Vlag van Verenigde Koninkryk Verenigde Koninkryk)
Stigting 1 April 1965
Bevolking
Totaal 263 200 (Junie 2014)[1]
Volgorde 61ste
Digtheid 13 809/vk km
Statistiek
Oppervlakte 19,06km²
Volgorde 321ste
Tydsone GMT (+0)
Somertyd BST (+1)
Webtuiste www.hackney.gov.uk
Wapen en vlag
Portaal  Portaalicoon   Londen

Hackney, amptelik die London Borough of Hackney, is een van die distrikte in die middestad van Londen met 'n oppervlakte van 18 km² (7,4 vierkante myl) en 'n bevolking van sowat 'n kwartmiljoen. Die distrik, wat net noord van die City of London en Tower Hamlets geleë is en in die ooste deur die River Lea begrens word, het oorspronklik deel uitgemaak van die historiese graafskap Middlesex.

Straattoneel in Great Eastern Street
Uitgediende moltreinwaens dien as kunstenaarsateljees - Great Eastern Street

Die huidige stadsdistrik is in 1965 met die samesmelting van drie vroeëre metropolitaanse distrikte (metropolitan boroughs) geskep - Shoreditch, Hackney en Stoke Newington. Dit sluit historiese nedersettings en stadsbuurte soos (van noord na suid) Stoke Newington, Upper Clapton, Lea Bridge, Lower Clapton, Dalston, Homerton, Hackney Wick, Hackney, Kingsland, Haggerston, Hoxton en Shoreditch in.

Shoreditch, 'n stadsdeel wat digby die City of London geleë is, het baie kenmerke van 'n besigheidsdistrik, terwyl die res van Hackney sterk residensiële karakter het, met enkele nywerheidsgebiede soos dié langs die Lea Valley.

Daar is uitgebreide groen ruimtes soos Hackney Marshes, Hackney Downs, Clissold Park, Springfield Park, London Fields en Millfields, terwyl ook die historiese Grand Union Canal deur die distrik loop. Sy gerieflike historiese behuising, sy ligging in die tans vooruitstrewende, maar vroeër minder aantreklike East End van Londen en die nabyheid van die middestad het van Hackney tradisioneel 'n gewilde vestigingsgebied vir opeenvolgende golwe van immigrante gemaak. Etniese minderhede verteenwoordig tans 'n derde van Hackney se bevolking, waaronder 'n groot gemeenskap Afro-Karibiërs. Stamford Hill is 'n tradisionele woonplek van ortodokse Jode.

Geografie[wysig | wysig bron]

Ligging[wysig | wysig bron]

Hackney se raadsaal dateer uit die 1930's

Hackney is 'n binnestedelike distrik van Groter Londen. Dit is noordoos van die City of London geleë en word deur die London Boroughs of distrikte Tower Hamlets in die suide, Islington in die weste (by Southgate Road), Haringey in die noorde en Newham in die suidooste begrens. Die River Lea vorm die oostelike distriksgrens met Waltham Forest. Die rivierloop was ook die historiese grens tussen die graafskappe Middlesex en Essex.

Hackney Town Hall, die distrik se raadsaal, is sowat agt km of vyf myl noord van Charing Cross geleë, met die St Pauls-katedraal halfpad tussen dié twee bakens, en 6,1 km of 3,8 myl vanaf die Greater London Authority (GLA) se administratiewe hoofgebou naby Tower Bridge.

Verwysings[wysig | wysig bron]