London Docklands

in Wikipedia, die vrye ensiklopedie
Spring na: navigasie, soek
'n Lugaansig van London Docklands, met die sakedistrik Canary Wharf aan die linker- en die O2-arena aan die regterkant

London Docklands is die naam vir 'n gebied in die ooste en suidooste van Londen, Engeland. Dit maak deel uit van die administratiewe distrikte (boroughs) Tower Hamlets, Lewisham, Newham en Greenwich. Die plaaslike dokke het oorspronklik deel uitgemaak van Londen se hawe wat op sy hoogtepunt die grootste ter wêreld was, maar is intussen herontwikkel om hoofsaaklik as woon- en sakebuurt te dien.

Die laaste lig van 'n besige werkdag weerkaats in die kantoorvensters van Canary Wharf

Die naam London Docklands is vir die eerste keer in 'n regeringsverslag oor die beplande herontwikkeling van die gebied in 1971 gebruik. Tans word dit algemeen gebruik om na dié voorheen benadeelde gebied in die ooste van die Britse hoofstad te verwys. Sowel die naam asook die herontwikkelingsprojek, wat daarmee verbind word, is nie heeltemal onomstrede nie. So is die London Docklands Development Corporation (LDDC), wat in 1981 in die lewe geroep is om die herontwikkeling van die Docklands te behartig, daarvan beskuldig dat dit met sy klemtoon op luukse eiendomsprojekte eerder na die belange van welgesteldes omgesien het as na dié van plaaslike gemeenskappe wat onder die tekort aan bekostigbare behuising gely het.