Magda Boyce

in Wikipedia, die vrye ensiklopedie
Jump to navigation Jump to search
Magdag Boyce, omstreeks 1949.

Magda Boyce (*27 Desember 1894, Barkley-Oos –† 1974) was ’n Afrikaanse skrywer van romans.

Lewe en werk[wysig | wysig bron]

Vroeë lewe en herkoms[wysig | wysig bron]

Maria Magdalena van Niekerk is op 27 Desember 1894 op Barkly-Oos gebore. Tydens die Anglo-Boereoorlog word haar vader as rebel op die dorp verhoor. Hy is kort tevore as Koloniale Kommandant verkies en hy word dus skuldig bevind aan hoogverraad. Dit is haar taak om as sewejarige dogter drie keer per dag kos vir haar vader in die gevangenis te neem. Hy word weens sy swak gesondheid slegs tot gevangenisstraf gevonnis en na die tronk in Tokai gestuur, terwyl die familie se plaas deur die Engelse verwoes word. Die soldate skiet alle perde en vee en vernietig die plantasies, met baie diere wat slegs gekwes word en dan in hulle lyding agtergelaat word. Hulle plunder ook die inhoud van die huis en neem die kos en toerusting wat hulle welgeval. ’n Jaar na die vredesluiting is haar moeder oorlede. Hierdie gebeure lei tot groot geldnood in die familie en Magda begin reeds op jeugdige ouderdom skoolhou op plaasskole om in die geldnood te voorsien.

Persoonlike lewe[wysig | wysig bron]

Met haar erfporsie van moederskant bekwaam sy haar later as kindertuin-onderwyseres en gee in hierdie hoedanigheid skool op Heilbron, Boshof, Aliwal-Noord en ook ander plekke. In Desember 1920 trou sy met Harry Archibald Boyce, later inspekteur in diens van die Suid-Afrikaanse Spoorweë en Hawens. Uit hierdie huwelik word vier kinders gebore, ’n seun en drie dogters. Later spits sy haar in selfstandige studie toe op Sielkunde en Duits. Sy is in 1974 oorlede.

Skryfwerk[wysig | wysig bron]

Reeds op jong ouderdom begin sy skryf, maar weens die ongewoonheid daarvan in daardie tyd word hierdie neiging deur die mense naby haar met wantroue bejeën. Die drang om te skryf onderdruk sy dus en eers in 1936 begin sy, onder aanmoediging van haar jongste suster, om haar skryfwerk ernstig op te neem. Aangesien sy slegs in Engels en Nederlands skoolonderrig ontvang het, gaan dit aanvanklik moeilik om in Afrikaans te skryf. Haar eerste pogings is dan ook verhale onder ’n skuilnaam in Engels vir tydskrifte, waarmee sy gemengde sukses behaal. Later begin sy in Afrikaans skryf vir Die Landbouweekblad en in 1938 behaal sy die eerste prys in ’n Kersfees-kortverhaalwedstryd van Die Huisgenoot. Sy publiseer eindelik ’n menigte kortverhale in tydskrifte soos Die Brandwag, Naweek, Die Landbouweekblad en Die Huisgenoot, terwyl sy ook verskeie romans skryf.

Stryd en oorwinning se tema is die konflik tussen liefde en godsdiens. Die ontblote swaard (en later ook Marya) behandel die gevoelens, begeertes en ontwikkeling van ’n kind. As die storm woed word aanvanklik ingeskryf vir die Afrikaanse Pers se romanwedstryd. In Hart van my hart is die hoofkarakter en die hele gemeenskap onder die indruk dat sy ’n weduwee is. Sy raak verlief op ’n man en die troudatum is reeds vasgestel wanneer sy uitvind dat haar man nog lewe.

Publikasies[wysig | wysig bron]

Jaar Publikasies
1939 Stryd en oorwinning (onder die naam H.A. Boyce)
1941 Die ontblote swaard
1943 Della se vuurproef
1945 Marya
1946 As die storm woed
1949 Rooi verraad
1950 Bouers van gebreekte mure
1952 Hart van my hart

Bronnelys[wysig | wysig bron]

Boeke[wysig | wysig bron]

  • Kannemeyer, J.C. Geskiedenis van die Afrikaanse literatuur 1. Academica, Pretoria en Kaapstad Tweede druk 1984
  • Nienaber, P.J. Hier is ons skrywers! Afrikaanse Pers-Boekhandel Johannesburg Eerste uitgawe 1949
  • Nienaber, P.J,; Senekal, J.H en Bothma, T.C. Mylpale in die geskiedenis van die Afrikaanse letterkunde. Afrikaanse Pers-Boekhandel Tweede hersiene uitgawe 1963
  • Nienaber, P.J. et al. Perspektief en Profiel. Afrikaanse Pers-Boekhandel Johannesburg Derde hersiene uitgawe 1969
  • Van Coller, H.P. (red.) Perspektief en Profiel Deel I. J.L. van Schaik-Uitgewers Pretoria Eerste uitgawe 1998
  • Van Coller, H.P. (red.) Perspektief en Profiel Deel 2. J.L. van Schaik-Uitgewers Pretoria Eerste uitgawe 1999

Internet[wysig | wysig bron]

Ongepubliseerde dokumente[wysig | wysig bron]