Mail & Guardian

in Wikipedia, die vrye ensiklopedie
Spring na: navigasie, soek

Die Mail & Guardian is 'n Suid-Afrikaanse koerant wat in 1985 begin is deur 'n groep joernaliste wat oortollig verklaar is na die sluiting van die Rand Daily Mail en die Sunday Express. 'n Ander groep van die personeellede het Business Day uit die Rand Daily Mail se sakeseksie begin.

Die koerant het aanvanklik bekend gestaan as die Weekly Mail en is weens finansiële oorwegings as 'n weekblad uitgebring. Die stigterslede het die redakteur Irwin Manoim en Anton Harber ingesluit. Die eerste uitgawe het op Vrydag 13 Junie 1985 verskyn. Die hoofartikel het gehandel oor die Suid-Afrikaanse polisie se aanhouding van Mosambiekse werkers wat dan aan Renamo oorhandig is. Die koerant was een van die eerste koerante ter wêreld wat Apple Macintosh-lessenaarsetwerk gebruik het.[1] [2]

Die Weekly Mail het fel kritiek gelewer op die Nasionale Party regering, die Apartheidbeleid en regeringsopterede wat daarmee gepaard gegaan het. Reeds in 1986 is 'n uitgawe van die winkelrakke verwyder as gevolg van verslaggewing oor die tweede noodtoestand wat deur PW Botha verklaar is. In 1988 is die koerant dan ook vir 'n tyd lank verbied. [2] Die koerant het tydens 1990 enkele maande lank as die dagblad Daily Mail verskyn, maar die koste het gou tot die einde van dié proefneming gelei. Daarna is teruggekeer tot die weeklikse uitgawe wat deurentyd Vrydae as Weekly Mail verskyn het.

In 1994 is Mail & Guardian Online gestig om die eerste Internet-nuuspublikasie in Afrika te word. Die Londen-gebaseerde Guardian Media Groep (GMG), uitgewer van die Guardian het in 1995 die hoofaandeelhouer geword en die koerant se naam is verander na Mail & Guardian. GMG het die meeste van die groep se aandele in 2002 aan die Zimbabwese koerantmagnaat Trevor Ncube verkoop[3]. GMG besit steeds 10% van die maatskappy.

Die huidige redakteur van die Mail & Guardian is Ferial Haffajee en die hoof- uitvoerende beampte is Trevor Ncube. Die koerant se webwerf word geredigeer deur Riaan Wolmarans en die uitgewer is Matthew Buckland.

Toekennings[wysig]

  • 1995 - Britse IPD Best International Newspaper Award
  • 1996 - Missouri Medal for Distinguished Journalism
  • 2001 - Forbes.com het die Mail & Guardian Online gekies as een van die top 175 webwerwe ter wêreld
  • 2005 - Webby Worthy eervolle vermelding.

Verwysings[wysig]

  1. Mail & Guardian, A brief history, Besoek op 17 Februarie 2007
  2. 2,0 2,1 Mail & Guardian, HISTORY OF THE MAIL & GUARDIAN, Besoek op 17 Februarie 2007
  3. Buckland, Matthew. “Trevor Ncube buys Mail&Guardian”. Mail&Guardian. URL besoek op 2006-11-29.

Eksterne skakels[wysig]