Manuae (Geselskapseilande)

in Wikipedia, die vrye ensiklopedie
Jump to navigation Jump to search
Manuae
Inheemse naam: Manua'e
’n Kaart van Manuae.
’n Kaart van Manuae.
Geografie

Ligging Stille Oseaan
Koördinate 16°31′S 154°42′W / 16.517°S 154.700°W / -16.517; -154.700Koördinate: 16°31′S 154°42′W / 16.517°S 154.700°W / -16.517; -154.700
Argipel Geselskapseilande

Administrasie
Sien teks.
Oorsese gebied Frans-Polinesië

Demografie
Bevolking Sowat 17

Ligging in die Geselskapseilande.

Manuae is ’n atol in die Benedewindse Eilande van die Geselskapseilande in Frans-Polinesië, ’n Franse oorsese gebied in die Stille Oseaan. Dit is die mees westelik geleë van die Benedewindse Eilande, en is 350 km wes van Bora Bora en 550 km wes van Papeete.

Beskrywing[wysig | wysig bron]

Manuae bestaan uit ’n ring eilande sowat 10 km in deursnee wat deur onbevaarbare openinge geskei word. Hulle steek net ’n paar meter bo die seevlak uit. Die verskillende koraalrifeilandjies van altesaam 3,5 km2 is met hoofsaaklik kokospalms, tropiese struike en sand bedek.

Die atol is administratief deel van die munisipaliteit Maupiti in die Benedewindse Eilande.

Die eilandjies se strandmeer bevat verskeie seldsame spesies en is sedert 1992 ’n natuurreservaat. Daar is baie seeskilpaaie, onder meer ’n bedreigde spesie, wat begin November elke jaar na die strande stroom. Daar is ook tussen 3 miljoen en 4 miljoen oesters.

Geskiedenis[wysig | wysig bron]

Manuae se eerste Europese besoeker was die Britse seevaarder Samuel Wallis, in 1767. Daar was in dié tyd ’n klein dorpie, waarvan die oorblyfsels steeds in die noordelike deel van die hoofeiland gesien kan word.

In 1855 het die skip Julia Ann by die atol gestrand. Die bemanning en passasiers, lede van die Kerk van Jesus Christus van die Heiliges van die Laaste Dae wat van Australië na Amerika onderweg was, het twee maande op die atol gewoon en ’n boot gebou waarmee hulle na Raiatea geseil het. Daar is geen bewyse dat ander mense vroeër daar gewoon het nie.

Van 1952 af is die eilande dikwels deur handelaars in gedroogde klapper besoek. In die 1960's het ongereelde besoekers groot getalle seeskilpaaie gevang totdat dit 1971 deur die wet beperk is. Die atol word vandag gereeld besoek deur vissers van Raiatea. Daar is geen gereelde skeeps- of lugverbinding tussen Manuae en ander eilande in Frans-Polinesië nie. Dit word besit deur die Compagnie Française de Tahiti, wat in die 1920's altesaam 57 000 kokospalms aangeplant het. Die nou verlate plantasies het eens tot 70 ton gedroogde klapper per jaar gelewer.

Ander name[wysig | wysig bron]

Van die ander name waaronder Manuae bekend is, is Fenua 'Ura en Putai (Tahitiaans), Isla de Pájaros ("Voëleiland", Spaans) en Scilly (Engels).

Eksterne skakels[wysig | wysig bron]