Marine Le Pen

Marine Le Pen
Marine Le Pen (2022)
Voorsitter van die Rassemblement National
Ampsbekleër
Termynaanvang 16 Januarie 2011
Voorafgegaan deur	Jean-Marie Le Pen
Persoonlike besonderhede
Gebore	5 Augustus 1968 Neuilly-sur-Seine (Île-de-France), Frankryk
Nasionaliteit	Frankryk
Politieke party	Rassemblement National
Eggenoot/-note	Louis Aliot

Marine Le Pen [maʁin ləpɛn], eintlik Marion Anne Perrine Le Pen (* 5 Augustus 1968 in Neuilly-sur-Seine) is 'n advokaat en Franse politikus wat as voorsitter van die Franse opposisieparty Rassemblement National (vroeër Front National) dien. Sy is die jongste van die drie dogters van Jean-Marie Le Pen, die oud-voorsitter van die Franse nasionalistiese party Front National (FN), en sy eerste eggenote, Pierrette Lalanne. Marine Le Pen is van haar eerste twee eggenote geskei en het drie kinders. Haar huidige lewensmaat is Louis Aliot, die visepresident van die FN.

Marine Le Pen het tydens die Straatsburgse kongres van die Front National in 1997 'n lid van die besturende liggaam van die party, die Politieke Buro, geword en sedert 1998 die party se regsafdeling geadministreer. In Julie 2002 het sy ook die voorsitter van Générations Le Pen, 'n organisasie vir jongmense, geword. Gerugte, dat sy haar vader as voorsitter van die Front National sou opvolg, het reeds in die herfs van 2002 groot publisiteit aan Marine Le Pen verskaf, en sy het vervolgens onder meer in talle televisieonderhoude as die moderne en aantreklike "gesig" van die party opgetree. Op 16 Januarie 2011 het sy haar vader as FN-voorsitter opgevolg.

Sedert die Europese verkiesing van 2004 is Marine Le Pen 'n afgevaardigde in die Europese Parlement. Op 23 April 2017 het sy as FN-kandidaat in die eerste rondte van die Franse presidensiële verkiesing die tweede plek na die liberale kandidaat Emmanuel Macron behaal met 33,9 persent van die uitgebragte stemme.

In 2018 het Marine Le Pen die Front National se naam gewysig na Rassemblement National, blykbaar om met die verlede en die politieke opvattings van haar vader te breek. So het sy strydige opvattings oor aborsie en burgerlike verbintenisse tussen persone van dieselfde geslag intussen laat vaar en pleit ook nie meer vir die doodstraf nie. Die Europese geldeenheid sou volgens haar deur middel van 'n geordende ontbinding van die Eurosone afgeskaf word.

Op 31 Maart 2025 is Le Pen, agt ander EP's en 12 assistente skuldig bevind aan bedrog omdat hulle fondse van die Europese Parlement gebruik het om personeel van die Rassemblement National te finansier. Die vonnisse vir verskeie EP-lede het verbode ingesluit om deel te neem politieke verkiesings. Le Pen is gevonnis tot vier jaar gevangenisstraf en 'n verbod van vyf jaar om vir politieke amp te deel te neem, wat haar effektief diskwalifiseer vir die 2027 Franse presidensiële verkiesing, en 'n boete van €100 000 opgelê.

Politieke loopbaan

In Maart 2017 het Marine Le Pen 'n gesprek met die Russiese president Wladimir Poetin gevoer

Marine Le Pen het bo-op die Front National se kandidatelys in die gewestelike kiesafdeling Île-de-France vir die verkiesing van die Europese Parlement (EP) in 2004 gestaan en is op 13 Junie as 'n lid van die EP verkies. Die Amerikaanse politieke tydskrif Politico het Marine Le Pen in 2016 as die tweede invloedrykste afgevaardigde in die Europese Parlement na die parlementspresident Martin Schulz geranglys.

Sy is in die tydperk tussen 1998 en 2004 'n lid van die Gewestelike Raad van Nord-Pas-de-Calais en sedert 28 Maart 2004 'n lid van die Gewestelike Raad van Île-de-France.

Werke

• (fr) À contre-flots, Éditions Jacques Grancher, Parys 2006

Eksterne skakels

• (en) Europese Parlement
• (fr) Amptelike biografie Geargiveer 27 November 2011 op Wayback Machine
• (fr) Marine Le Pen