Mir-Hossein Moesawi

in Wikipedia, die vrye ensiklopedie
(Aangestuur vanaf Mir-Hossein Mousavi)
Mir-Hossein Moesawi Chameneh
Mir-Hossein Moesawi

Premier van die
Islamitiese Republiek van Iran
Ampstermyn
31 Oktober 1981 – 3 Augustus 1989
Voorafgegaan deur Mahdawi Kani
Opgevolg deur Amp afgeskaf

Minister van Buitelandse Sake
Ampstermyn
15 Augustus 1981 – 15 Desember 1981
Voorafgegaan deur Mohammad-Ali Radjai
Opgevolg deur Ali Akbar Welajati

Adjunkleier van die Islamitiese Republikeinse Party
Ampstermyn
18 Februarie 1981 – 15 Mei 1987
Voorafgegaan deur Hassan Ajat
Opgevolg deur Party ontbind

Persoonlike besonderhede
Gebore 2 Maart 1942
Chameneh, Iran
Politieke party Die Groen Pad van Hoop
Eggenoot/-note Zahra Rahnaward (1969-)
Alma mater Nasionale Universiteit van Teheran
Religie Sjiisme
Handtekening Mir-Hossein Mousavi signature.svg

Mir-Hossein Moesawi Chameneh (Persies: میرحسین موسوی خامنه, [miːɾ hoˈsein muːsæˈviː xɒːmeˈne] Mīr-Hoseyn Mūsavī Khāmené; Azerbeidjans: میرحسین موسوی, Mir Hüseyn Musəvi; * 2 Maart 1942) is 'n Irannese hervormingsgesinde politikus, kunstenaar en argitek wat tussen 1981 en 1989 as die 79ste en laaste eerste minister van Iran gedien het. Hy was die hervormingsgesinde kandidaat in die Irannese presidensiële verkiesing van 2009 en het tydens die politieke proteste oor die verkiesingsuitslag as opposisieleier opgetree. Moesawi het tot en met 2009 as voorsitter van die Irannese akademie van die kunste gedien, maar is deur behoudende owerheidslede uit sy amp gelig.

In die vroeë jare van die Irannese Rewolusie was Moesawi hoofredakteur van Jomhoeri-e Eslami, die amptelike dagblad van die Islamitiese Republikeinse Party, en is daarna as minister van buitelandse sake en uiteindelik as premier benoem. Hy was die laaste politikus wat dié amp beklee het voordat dit deur 'n wysiging van die grondwet in 1989 afgeskaf is. In die volgende 20 jaar was hy 'n halfafgetredene. Hy is steeds 'n lid van die raad van geskiktheid en ooordeel en die hoë raad van die kulturele rewolusie, maar het al jare lank nie meer aan dié liggame se vergaderings deelgeneem nie – 'n houding wat deur politieke ontleders en kommentatore as 'n teken van sy ongenoeë beskou word.

Vir die presidensiële verkiesing van 2009 het Moesawi na die politieke toneel teruggekeer en is hy as een van twee hervormingsgesinde kandidate teen die administrasie van die destydse ampsbekleër, Mahmoed Ahmadinedjad, gestel. Moesawi het groen as die simboliese kleur van sy beweging gekies. Volgens die amptelike verkiesingsuitslae het hy die verkiesing nie gewen nie, en ontevrede aanhangers het die regering van manipulasie beskuldig. Proteste teen die verkiesingsuitslag het tot 'n nasionale politieke beweging teen die regering en die hoogste leier Ali Chamenei, gegroei. Ondanks die owerheid se ferm optrede is Moesawi steeds die leier van die Groen Beweging, al is sy aktiwiteite aan bande gelê. Hy is tans saam met sy vrou en Mehdi Karroebi, 'n ander hervormingsgesinde politikus, in huisarres.