Moulin Rouge

in Wikipedia, die vrye ensiklopedie
Jump to navigation Jump to search
Moulin Rouge in die nag.
Moulin Rouge, deur Henri de Toulouse-Lautrec.

Moulin Rouge[1] (IFA: mulɛ̃ ʁuʒ; Frans vir "Rooi Meul") is ’n kabaret in Parys, Frankryk.

Die klub is in 1889 deur Charles Zidler en Joseph Oller gestig; hulle het ook die Paris Olympia besit. Dit is naby Montmartre geleë in die Paryse distrik Pigalle in die 18de arrondissement, en word uitgeken aan die rooi windmeul op sy dak.

Moulin Rouge is veral bekend as die geboorteplek van die moderne vorm van die dans cancan. Dit is aanvanklik bekend gestel as ’n verleidelike dans deur die courtesanes van die klub, maar het ontwikkel in ’n vermaakvorm van sy eie en het gelei tot die bekendstelling van kabarette oor die hele Europa. Die Moulin Rouge is vandag ’n besienswaardigheid wat musikale dansvermaak bied aan toeriste van oor die wêreld. Die klub se dekor beeld steeds in ’n groot mate die romanse van die Frankryk van die fin de siècle uit.

Sukses[wysig | wysig bron]

Die Belle Époque was ’n tydperk van vrede en optimisme wat gekenmerk is deur industriële hoogtepunte. Die Eiffeltoring is ook in 1889 gebou, en dit was ’n toonbeeld van dié tyd se vooruitgang. Japonisme, ’n kunsbeweging wat deur die Ooste geïnspireer is en met Henri de Toulouse-Lautrec as een van sy bekendste dissipels, het ook in dié tyd gedy.

Montmartre, in die hart van ’n groter wordende en onpersoonlike Parys, het ’n dorpsatmosfeer behou, met plesier en skoonheid as belangrikste kenmerke. Moulin Rouge het op 6 Oktober 1889 in die Jardin de Paris, aan die voet van die Montmartre-heuwel, geopen. Zidler en Oller was uitstekende sakemanne wat die smake van die publiek verstaan het. Die doel van die klub was dat die rykes dekadent kon kom wees in die sjiek distrik Montmartre.

Die uitspattige terrein – die tuin was versier met ’n reusagtige olifant – het meegebring dat mense uit alle vlakke van die samelewing hier gemeng het. Werkers, inwoners van die Place Blanche, kunstenaars, die middelklas, sakemanne, elegante vroue en buitelanders het hier skouers geskuur.

Verwysings[wysig | wysig bron]

Eksterne skakels[wysig | wysig bron]

Koördinate: 48°53′3″N 2°19′56″O / 48.88417°N 2.33222°O / 48.88417; 2.33222