Otto du Plessis-pad
Die Otto du Plessis-pad verbind die Swartbergpas met Gamkaskloof. Hierdie nou pad van nagenoeg 50 km is in so 'n swak toestand dat dit slegs geskik is vir die gebruik van motors met 'n hoë grondvryhoogte. Die mees westelike deel van die pad is die Elandspadpas. Om die hele lengte van die pad af te lê, duur ongeveer 3 uur.
Die pad is op 9 Augustus 1962 deur Nico Malan, die administrateur van Kaapland, geopen en dra die naam van sy voorganger Otto du Plessis. Ingenieur P. Reilly was die ontwerper en J.W. van Zyl die bouer van die pad. 'n Beskeie monument staan by die afdraai uit die Swartbergpas.
Die Otto du Plessis-rylaan (deel van die M14) loop van Milnerton noordwaarts langs die kus na Melkbosstrand, Duynefontein en die kernkragsentrale by Koeberg.
Beide paaie moet nie verwar word met die Otto du Plessis-pas in die Oos-Kaap tussen Ida en Clifford nie.