Palermosteen

in Wikipedia, die vrye ensiklopedie
Jump to navigation Jump to search
Die Palermosteen, die fragment van die Egiptiese Koninklike Annale wat in Palermo, Italië, gehou word.

Die Palermosteen is een van sewe fragmente van ’n stele bekend as die Koninklike Annale van die Ou Ryk van Antieke Egipte. Die stele bevat ’n lys van die konings van Egipte vanaf die 1ste Dinastie tot die eerste deel van die 5de Dinastie en dui belangrike gebeure in elke jaar van hul bewind aan. Dit is waarskynlik tydens die 5de Dinastie gemaak (omstreeks 2392-2283 v.C.).[1] Die steen word in die Antonio Salinas Argeologiese Streeksmuseum in die Italiaanse stad Palermo gehou, vandaar die naam.

Die naam Palermosteen word soms gebruik vir al sewe fragmente van die Koninklike Annale, ook dié wat in Kaïro en Londen gehou word. Die fragmente is waarskynlik die oudste historiese teks wat uit Antieke Egipte behoue gebly het en is ’n baie belangrike bron vir die geskiedenis van die Ou Ryk.

Beskrywing[wysig | wysig bron]

Die Koninklike Annale was vermoedelik oorspronklik sowat 60 cm hoog en 2,1 m breed. Dit bestaan uit ’n harde swart steen, moontlik ’n vorm van basalt.

Die Palermosteen self is ’n oneweredige en skildvormige 43,5 cm hoog, 25 cm breed en 6,5 cm dik (maksimum afmetings).

Die inskripsies aan die voorkant bestaan uit ses horisontale kolomme van registers in Egiptiese hiërogliewe wat van regs na links loop. Die eerste register noem die name van die predinastiese konings van Benede-Egipte (geïdentifiseer deur die Rooi Kroon). Die tweede en daaropvolgende registers bevat dele van die Koninklike Annale vir farao's van die 1ste tot die 4de Dinastie – belangrike gebeure in elke jaar van die bewind van elke koning, in chronologiese volgorde. Die tweede register begin met die finale jaar van ’n 1ste-dinastiese koning wie se naam nie behoue gebly het nie, maar vermoedelik óf Narmer óf Hor-Aha was.[2]

Die teks gaan voort op die agterkant van die Palermosteen en noem die gebeure tydens die bewind van farao's tot by Neferirkare, die derde heerser van die 5de Dinastie.[3] Dit is nie moontlik om uit die fragmente af te lei of die registers voortgesit is vir latere farao's nie.

Inligting op die steen sluit in metings van die hoogte van die jaarlikse Nyl-oorstromings en die seisoen van die oorstromings, asook besonderhede oor feeste soos Sed-feeste, belasting, standbeelde, geboue en oorloë.[4]

Verwysings[wysig | wysig bron]

  1. Dodson, Aidan (2004) The Complete Royal Families of Ancient Egypt, p.62. Thames & Hudson, ISBN 0-500-05128-3.
  2. Lloyd, Alan B. (1988), Commentary on Herodotus 99-132 p.8.
  3. O'Neill, John P. Egyptian Art in the Age of the Pyramids. p.349. Yale University Press. The Metropolitan Museum of Art. 1999. ISBN 0-87099-907-9
  4. Shaw, Ian (2003) The Oxford History of Ancient Egypt, p.5. Oxford University Press. ISBN 0-19-280458-8.

Bronne en skakels[wysig | wysig bron]

  • St. John, Michael (1999). The Palermo Stone : An Arithmetical View. Londen: University Bookshop Publications.ISBN0-9536-8650-7
  • Wilkinson, Tony A. H. (2000). Royal Annals of Ancient Egypt. New York: Columbia University Press). ISBN 0-7103-0667-9.