Peers-grot
Die Peers-grot is 'n grot naby Vishoek waar 'n kopbeen van 'n prehistoriese mens gevind is en wat moontlik selfs 20 000 jaar oud kan wees.
Net noord van Sun Valley en noordwes van Clovelly is 'n reeks sanderige koppies bekend as Skildergat. Daarin is verskeie vlak grotte, onder andere Tonnelgrot en die Peers-grot. Victor Stanley Peers (1874-1940) en sy seun Bertie (1903-1939) het baie in antropologie en argeologie belanggestel en het in die jare 1927 tot 1929 in hul vrye tyd hier opgrawings gedoen en op klipwerktuie, rotstekeninge en volledige skelette afgekom.
Die kopbeen van die Vishoekmens was aansienlik groter as dié van die latere Khoisan. Die kopbeen is wêreldwyd uitgestal en deur argeoloë bestudeer en kan nou in die Suid-Afrikaanse Museum in die Kompanjiestuin besigtig word. In 1941 is die grot tot monument verklaar.
Bibliografie
[wysig | wysig bron]- Burman, Jose: Cape drives and places of interest. Kaapstad: Human & Rousseau, 1975. ISBN 0-7981-0534-8
- Green, Lawrence G.: Tavern of the seas. Kaapstad: Howard B. Timmins, 1947.
- Standard Encyclopaedia of Southern Africa, deel 9. Kaapstad: Nasou, 1973. ISBN 0-625-00325-X
- Tredgold, Arderne: Bay between the mountains. Kaapstad: Human & Rousseau, 1995. ISBN 0-7981-3424-0