Prinses Margaret, Gravin van Snowdon

in Wikipedia, die vrye ensiklopedie
Jump to navigation Jump to search
Prinses Margaret
Gravin van Snowdon
Princess Margaret.jpg
Gebore 21 Augustus 1930
Glamis-kasteel, Skotland
Volle naam Margaret Rose
Oorlede 9 Februarie 2002 (op 71),
Londen, VK
Eggenoot Antony Armstrong-Jones, 1ste Graaf van Snowdon (6 Mei 1960 – 11 Julie 1978, geskei)
Kinders David Armstrong-Jones, burggraaf Linley
Lady Sarah Chatto
Vader George VI van die Verenigde Koninkryk
Moeder Elizabeth Bowes-Lyon

Prinses Margaret, gravin van Snowdon (Margaret Rose; 21 Augustus 19309 Februarie 2002) was die jongste dogter van koning George VI van die Verenigde Koninkryk en sy vrou, koningin Elizabeth, en die enigste sibbe van koningin Elizabeth II.

Kinderjare[wysig | wysig bron]

Margaret is in Glamis-kasteel in Skotland gebore.[1] Sy het ’n groot deel van haar kinderjare in die geselskap van haar ouers en ouer suster deurgebring. Haar lewe het in 1936 drasties verander toe haar pa se broer, koning Edward VIII, abdikeer om met die Amerikaner Wallis Simpson te trou wat twee keer geskei was. Margaret se pa het koning geword en haar suster die eerste aanspraakmaker op die troon, met haar as tweede aanspraakmaker.

Tydens die Tweede Wêreldoorlog het die susters in Windsor-kasteel gewoon,[2] ondanks voorstelle dat hulle eerder na Kanada gestuur word. Gedurende die oorlog was Margaret te jonk om amptelike pligte na te kom en het sy haar studies voortgesit.

Liefdeslewe[wysig | wysig bron]

Prinses Margaret in 1965.

Ná die oorlog het sy verlief geraak op die lugmagkolonel (group captain) Peter Townsend. In 1952 is haar pa oorlede, het haar suster koningin van die Verenigde Koninkryk geword en is Townsend van sy eerste vrou geskei. Hy het Margaret vroeg die volgende jaar die jawoord gevra.

Baie mense in die regering het gevoel hy is nie ’n geskikte man vir die koningin se 22-jarige suster nie omdat hy 16 jaar ouer as sy was[3] en die Anglikaanse Kerk het geweier om die huwelik van ’n geskeide man goed te keur.

Die Britse lugmag het Townsend na Brussel gestuur. Margaret het van ’n huwelik met hom afgesien en in 1960 ’n huweliksaanbod van die fotograaf Antony Armstrong-Jones aanvaar. Hy het ná die troue die titel graaf van Snowdon gekry.

Die seremonie was die eerste koninklike huwelik wat op televisie uitgesaai is[4] en 300 miljoen mense wêreldwyd het daarna gekyk.[5] Die meeste koninklike families in Europa het egter haar huwelik met ’n fotograaf afgekeur; koningin Ingrid van Denemarke was al buitelandse koninklike wat die troue bygewoon het.[6] Die egpaar het twee kinders gehad en is in 1978 geskei.[7]

Margaret is dikwels beskou as ’n omstrede lid van die koninklike familie. Sy het negatiewe publisiteit oor haar egskeiding gekry en is romanties met verskeie mans verbind. Veral haar romanse met Roddy Llewellyn, wat 17 jaar jonger as sy was, het opspraak gewek.[8]

Dood[wysig | wysig bron]

Haar gesondheid het in die laaste twee dekades van haar lewe geleidelik agteruitgegaan; sy was haar hele volwasse lewe ’n strawwe roker en het in 1985 ’n longoperasie ondergaan, in 1993 longontsteking gehad en tussen 1998 en 2001 minstens drie beroertes.[9]

Sy is op 9 Februarie 2002 op 71 in die Koning Eduard VII-hospitaal in Londen oorlede nadat sy nog ’n beroerte gehad het.[10]

Verwysings[wysig | wysig bron]

  1. London Gazette 33636, 22 Augustus 1930, bl. 5225
  2. Crawford, pp.14–34; Heald, pp.7–8; Warwick, pp.35–39
  3. Warwick, p.191
  4. Caroline Davies (10 Februarie 2002), "A captivating woman...", The Daily Telegraph (VK), http://www.telegraph.co.uk/news/uknews/1384451/A-captivating-woman-who-was-courted-by-many-suitors-but-failed-to-find-lasting-love.html, besoek op 17 Oktober 2008 
  5. Warwick, p.227
  6. Documentary Happy and Glorious – Royal Weddings On Film
  7. Newspapers Remembered Royalty – Princess Margaret Divorce”. Newspapers Remembered. URL besoek op 17 Oktober 2008.
  8. Warwick, p. 258
  9. Warwick, pp.299–302
  10. Warwick, p.304

Bronne[wysig | wysig bron]

  • Crawford, Marion (1950), The Little Princesses, Londen: Cassell and Co 
  • Heald, Tim (2007), Princess Margaret: A Life Unravelled, Londen: Weidenfeld and Nicolson, ISBN 978-0-297-84820-2 
  • Warwick, Christopher (2002), Princess Margaret: A Life of Contrasts, Londen: Carlton Publishing Group, ISBN 0-233-05106-6 

Eksterne skakels[wysig | wysig bron]