Ralph Bernstein

Prof. Ralph Bernstein (7 Februarie 1914 – Johannesburg, 19 Oktober 2013) was ’n senior lektor in fisiologie aan die Universiteit van die Witwatersrand, waarvan sy broer Bertrand van 1975 tot '82 kanselier was.

Opleiding

Bernstein het die grade B.Sc. (1934), B.Sc. (Hons.) (1936) en M.Sc. (1937) aan Wits verwerf, waarna ’n M.B.B.Ch. (cum laude) in 1940 gevolg het, aan dieselfde universiteit. Hy het in 1934 die William Cullen-medalje vir die mees uitstaande afgestudeerde in wetenskap verwerf.

Loopbaan

Bernstein het in 1945 aan Wits begin doseer. Sy studieveld was nier- en chemiese fisiologie. Terwyl hy dosent aan Wits was, het hy ’n Diploma in Kliniese Patologie van die Royal Postgraduate Medical School in Londen verwerf, ’n ruk lank aan die King's College Medical School in dieselfde stad studeer en ’n jaar aan die Universiteit van New York se Mediese Skool deurgebring.

In 1957 is hy aangestel as hoof van die Navorsingseenheid vir Menslike Genetika en Metabolisme van die Suid-Afrikaanse Instituut vir Mediese Navorsing, waarvan sy ouer broer, Bertrand, van 1953 tot '60 voorsitter was. Hy was ’n genoot van die Royal College of Pathology (Londen) en in 1975 het Wits hom as ereprofessor in chemiese patologie aangestel. Hy het die jaar daarna afgetree.

Prof. Bernstein het in sy vrye tyd graag tuingemaak en was ’n ywerige leser. Hy was ’n tyd lank voorsitter van die Suid-Afrikaanse Irisvereniging.

Bernsteins aan Wits

Die familie Bernstein se verbintenis met Wits het reeds in die 1920's begin toe Ralph se ouer broer, Bertrand, in 1928 die eerste graad aan die universiteit verwerf. Hul suster, dr. Elaine Epstein, het in 1940 aan die Mediese Skool afstudeer. Ralph was getroud met dr. Mary Salkinder (MB.B.Ch., 1954) en hul kinders, Irene en Geoffrey is albei Wits-graduandi, asook Ralph se kleindogter dr. Penny Bernstein. Ten tyde van sy dood het prof. Ralph Bernstein drie kleinkinders, Penny, Ze'ev en Talia gehad, en twee agterkleinkinders, Gabriella en Jack, gehad.

Bronne

• (af) (en) Kruger, dr. D.F. 1963. Wie is wie in Suid-Afrika. Johannesburg: Vitae Uitgewers.
• (en) Wits Review, Januarie 2014]. URL besoek op 19 November 2017.