Rekenaarbediener

in Wikipedia, die vrye ensiklopedie
Spring na: navigasie, soek

'n Rekenaarbediener is 'n rekenaarstelsel wat daarop gemik is om spesifieke bedienersprogram/programme te loop. 'n Rekenaarbediener wat slegs een spesifieke bedienerprogram hardloop word dikwels na verwys na aanleiding van die soort bedienerprogram. Só byvoorbeeld sal 'n rekenaar in 'n onderneming wat die Apache webbediener program loop as die onderneming se webbediener bekend staan. Bedienerprogramme word oor rekenaarbedieners verdeel na gelang van die lading wat op die masjien geplaas word. Wanneer die lading lig is kan verskeie bedienerprogramme gelyktydig op dieselfde rekenaar loop. As die lading hoog is kan verskeie rekenaars vereis word om 'n enkele bedienerprogram doeltreffend te loop. Met 'n mediumlading is dit gewoonlik die praktyk om 'n enkele bedienerprogram per rekenaarbediener te loop, ten einde die skade wat veroorsaak kan word deur die faling van 'n enkele rekenaarbediener of die inbraak op sekuriteitsmeganismes van 'n bedienerprogram te beperk. 'n Rekenaarbediener kan gewoonlik ook as 'n werkstasie gebruik word maar dit is goeie praktyk om dit te vermy weens sekuriteitsrisiko's wat dit inhou.

Die term rekenaarbediener word ook dikwels gebruik om na rekenaars te verwys wat doelgemaak is met die oog daarop om bedienerprogramme te loop met swaar werksladings en sonder toesig vir lang tye. Dikwels kan gewone tafelrekenaars ook gebruik word om bedienerprogramme te loop maar rekenaarbedieners het dikwels kenmerke wat hul meer geskik vir die doeleinde maak. Kenmerke wat rekenaarbedieners van gewone persoonlike rekenaars onderskei is onder andere vinniger verwerkers en -geheue, meer geheue, groter hardeskywe, hoër betroubaarheid, bystandkragbronne, bystandhardeskywe (RAID), kompakte vorm en 'n modulêre ontwerp (soos bv. blade bedieners), rak- of kabinetmonteerbaarheid, afstandskonsoles, ensovoorts.

Hardeware[wysig]

Rekenaarbedieners kan dikwels gebou word uit goedkoop kommoditeitstoerusting veral waar die toepassing nie kritiek is nie. Waar die bediener egter aan 'n hoë werkslading onderworpe is en bedienerprogramme loop wat kritiek is vir die organisasie/onderneming word gespesialiseerde hardeware dikwels gebruik wat geoptimiseer is vir bedienertoepassings. Estetiese oorwegings word dikwels geïgnoreer aangesien die bedieners in rekenaarkamers weggesluit word en slegs besoek word vir onderhouds- of hersteldoeleindes.

Rekenaarbedieners hoef dikwels glad nie 'n grafiese koppelvlak te verskaf nie wat meer verwerkingsvermoë laat vir ander take. Doelgemaakte rekenaarbedieners het ook dikwels meer as een sentrale verwerkingseenheid om betroubaarheid en bystandvermoë te verhoog. Sulke bedieners doen dus dikwels weg met die behoefte aan duur grafiese- en klankverwerkingskaarte.

Die grootste verskil tussen gewone tafelrekenaars en rekenaarbedieners is nie soseer in die hardeware nie maar eerder in die programmatuur wat daarop gelaai word. Daar word gewoonlik 'n doelgemaakte bedryfstelsel op 'n rekenaarbediener gelaai asook ander sagteware wat daarop gemik is om bediener spesifieke take te verrig.

Bedienerbedryfstelsels[wysig]

Verskeie doelgemaakte bedryfstelsels bestaan om netwerkbestuurstake te vergemaklik. Microsoft het verskeie weergawes van hul Windows 2003 bedryfstelsel met die oog op verskillende segmente van die netwerkmark (d.w.s. vanaf kleinsake-ondernemings tot groot ondernemings). Ander netwerkbedryfstelsels sluit in die GNU/Linux verspreidings, FreeBSD en Solaris.

Rekenaarbedeniers en die Internet[wysig]

Die Internet is gebaseer op die Kliënt-bediener model. Daar is miljoene rekenaarbedieners wat aan die internet verbind is. Van die dienste wat deur Rekenaarbedieners op die internet verskaf word is: Web, Domeinnaamstelsel, elektroniese pos, lêeroordrag, kitsboodskappe, oudio- en videostrome, aanlyn speletjies en vele ander. Elke aksie wat deur 'n internetgebruiker uitgevoer word vereis gewoonlik die interaksie tussen baie rekenaarbedieners.

Sien ook[wysig]